Atu kontrola apoiu osan ka bens ruma husi pesoal ka partidus politiku sira ba komunidade sira, Fundasaun Mahein (FM) rekomenda ba governu atu kria lei ida kona ba money politic nian.
“Foin dadauk ne’e FM halo peskiza no monitorizasaun ba iha eleisaun prezidensial ba primeira volta, identifika katak kandidatu balun halo pratika money politic ba iha komunidade sira,” dehan Peskizador FM Joao Almeida Fernandes, semana kotuk,(28-03) iha Balide, Dili.
Tuir nia, pratika money politic sei hafraku prosesu demokrasia no sei hamate prinsipiu demokrasia iha ambitu liberdade no imparsialidade e mos sei hafoer imajen poder politiku husi povu no estadu de direitu demokratiku.
“Tanba ne’e FM rekomenda ba governu presiza halo lei kona ba pratika money politic atu kontrola apoiu osan ka bens ruma husi pesoal ka partidu politika,” Peskizador Fernandes rekomenda.
Entertantu Membru Komisaun A, Deputadu Antonino Bianco, kestaun money politic kuaze akontese iha ne’ebe deit maibe tenke bazea ba evidensia ne’ebe forte.
“Hau nia hanoin kestaun money politic ne’e kuaze akuntese dalabarak ona, mais problema mak ne’e, ita tenki aprezenta evidensia se maka halo ida ne’e, akuntese iha nebe, ne’e para prosesu lei ne’e bele la’o, mais kuandu issue-issue deit ne’e mak problema,” Deputadu Bianco dehan.
Nia hatutan, Parlamantu nebe mak diak, governu nebe maka diak tenki rona aspirasaun povu.
“Balu nia buka hatene, balu nia rona deit mos nia halo tuir ne’e mak Parlamentu no Governu nebe mak diak,” Deputadu Bianco katak.
