Deputadu husi Bankada Opozisaun preokupa ho kondisaun estrada Fatu-ahi nebe ke’e iha tinan kotuk,agora grave tebes no fo impaktu ba movimentu transporte sira.
“Agora estrada Fatu-ahi kala tinan ida resin ona, ke’e husik hela deit hanesan ne’e, agora mai tan iha Dili laran, kuaze estrada sira ne’e ke’e arbiru deit, halo ita mos la’o la diak,” levanta Deputadu Inacio Moreira, iha plenaria Parlamentu semana kotuk,(20/03).
Deputadu Moreira ne’ebe hanesan membru Komisaun G Parlamentar ne’e, husu ba Ministeriu kompetente atu hadia lalais Estrada ne’e, nune’e transporte sira bele ba-mai diak.
Iha fatin hanesan Prezidenti Komisaun G ne’ebe trata asuntu Instra-estrutura no Ekipamentu Sosiais,Deputadu Pedro da Costa hateten, asuntu ne’e komisaun rekomenda bebeik ona ba iha minisiteriu kompetente, atu halo estudu viabilidade, hodi halo moru protesaun ba iha fatin ne’e.
“Konstrusaun ne’ebe halo dadauk iha neba ne’e ladun diak atu responde situasaun ne’e,” Prezidente da Costa kritika.
Tuir Deputadu da Costa, orsamentu nebe aloka ba iha projeitu ne’e la’os husi orsamentu jeral du estadu nian maibe liu husi projeitu emerjensia.
Hatan ba preokupsaun ne’e Sekretariu Estadu Obras Publiku, Domingos Caero katak, rai neba risku tebe-tebes wainhira tempu udan.
“Maske ami halo ona estudu iha fatin ne’eba, mais hare foin dadauk udan tun mai ne’e mai monu mai la’os ema ida mak suru rai ne’e mak tun mai,” SE. Caero hatan.
Tanba ne’e mak oras ne’e dadauk ekipamentus sira prepara ona iha fatin neba, nune’e wainhira rai monu bele dudu ses tiha, SE. dehan tan.
