Ho eleisaun Prezidensial II volta no Parlamentar ne’ebe besik dadaun, Organizasaun Non Governmentaiz (NGO) Rede Feto (RF) kolabora ho joventude no estudantes universitario sira realize programa ‘Jornada da Paz’ atu hatudu ba povu tomak katak jerasaun foun kontinua hametin paz no estabilidade iha prosesu eleitoral to’o rezultadu eleisaun, tanba joven mak hanesan mata dalan ba dame no estabilidade iha rai laran.
“Ita hotu ohin hala’o aktividade jornada da paz hodi halibur hamutuk joven foinsa’e sira, atu hatudu ba ita nia povu katak ita pronto atu garantia situasaun iha prosesu eleisaun ho paz no estabilidade atu elisaun tinan ida ne’e la’o ho susesu,” hateten Diretora Ezekutiva, Yasinta Luzina, semana kotuk (28/03) iha Jardin Rosa Muki Bonaparte, Mandarin, Dili.
Programa Jornada da paz hahu ho long mars husi Jardin Rosa Muki Bonaparte Mandarin to’o iha Jardin da Paz Lecidere ne’ebe anima ho muzika no lee puizia husi joventude sira.
Entretantu membru RF, Filomena Reis hateten joven mak futuru nasaun nian, tanba ne’e labele lakon direitu atu deside lideransa tuir konsiensia rasik iha eleisaun prezidensial segundu volta nian ne’ebe sei hala’o iha 16 Abril fulan ne’e.
“Husu ba joven sira labele nonok deit bainhira iha buat ruma la los iha prosesu dezenvolvimentu, buka atu koalia lia los labele tauk atu koalia lia los, luta ba justisa ho ida ne’e deit ita bele la’o ba oin,” dehan Reis iha nia mensagen iha programa jornada da paz ne’e.
Tuir Reis, luta ba dame ne’e lafasil maibe prosesu ne’ebe naruk no dezafiu barak mak sei hasoru, ema sei tolok no koalia at hasoru “ita labele koalia at hasoru ema ne’ebe la gosta maibe hasoru ho hamnasa deit ita sei manan buat hotu,” Nia katak.
Iha oportunidade hanesan Reprezentante Universidade, estudante Inocencio de Jesus hateten koalia konaba dame lia fuan ne’ebe luan katak dame mai husi ema ida –idak nia fuan atu garantia estabilidade nasaun nian iha futuru.
“Husu ba inan aman no joventude sira ne’ebe ativu iha aktividade politika atu respeita nafatin ema seluk nia direitu tanba demokrasia laos obriga malu maibe atu simu malu hodi hakat ba prosesu dezenvolvimentu iha ita nia rai no nasaun ,” Estudante de Jesus husu.*
