Tuir Embaixador Australia iha Timor-Leste, Miles Armitage katak, implementasaun programa Bee Saneamentu no Ijiene iha Komunidade (BESIK) ne’ebe apoiu husi Governu Australia liiu husi AusAID, hatudu progresu ne’ebe diak tanba hafoin implementa durante tinan hat nia laran iha komunidade no eskola inklui Sentru Saude sira barak mak asesu ona ba iha bee moos.
“Bazea ba relatoriu ne’ebe programa BESIK iha, iha ona ema 60,000, eskola 52 no sentru saude 42 mak asesu ona ba bee moos iha teritorio tomak,” hateten Embaixador Armitage, semana kotuk (27/3) bainhira partisipa iha serimonia loron mundial bee moos nian, iha Dili.
Embaixador Armitage afirma, AusAID iha komitmentu atu suporta finanseiru hodi kontinua programa BESIK II ba area rurais ne’ebe seidauk asesu ba bee moos no saneamentu tanba importante tebes ba komunidade sira moris iha embairomentu ne’ebe moos.
“Ami serbisu ona hamutuk ho Ministerio Infra-Estrutura no Saúde no mos ajensia governu sira seluk, hodi halo dezenhu ba programa BESIK ba fase segundu nian, ami iha komitmentu atu kontinua fo supporta ba tinan walu tan,” hatutan Embaixador Armitage.
Tuir Embaixador ne’e, total orsamentu ne’ebe AusAID fo ba governu Timor-leste liu husi Ministeriu Saude no Ministeriu Infra-Estrutura hamutuk US$ 40 miliaun resin, atu responde dezafiu konaba bee moos nian ba komunidade sira, liu-liu iha area rurais sira ne’ebe seidauk asesu ba programa BESIK.
Iha lidun seluk Ministru das Infra-Estrutura, Pedro Lay hato’o agradesementu ba Governu Australia liu husi AusAID ne’ebe supporta ona Timor –Leste atu atinji mehi ne’ebe iha katak komunidade hotu iha teritorio tomak bele asesu ba bee mos no ijiene ne’ebe seguru.
“Ita espera katak ho supporta ida ne’e governu no parseiro dezenvolvimentu sira ita bele atinji ita nia objetivu milinium ne’ebe ita mehi tinan 2015, Timor oan iha teritorio tomak bele hetan asesu ba bee moos no saneamentu ne’ebe seguru,” Ministru Lay esperansa.
Ministru Lay hatutan, programa BESIK ba dala rua bele tulun infra-struktura baziku, e mos bele elemina moras baziku hanesan dengue, kabun moras, malaria no seluk tan tanba bee no saneamentu importante tebes ba saude.
Entretantu tuir Diretor Interino Servisu Agua e Saneamentu (SAS) Elias Perreira Moniz, katak programa BESIK ba primeiru faze sei remata iha 30 Junu tinan ne’e, no sei kontinua ho BESIK II iha 01 Julhu, durante tinan ualu nia laran tuir akordu ne’ebe governu rua ne’e halo ona.
“Ho apoiu ne’ebe iha, ita bele atinji objetivu Milinium Development Gold no ita bele hamenus moras ne’ebe iha relasaun ho bee moos no saneamentu,” dehan Diretor Interino SAS, Moniz.
