“Ami hein katak antes vizita Xefe Estadu Indonezia, Senhor Prezidenti Susilo Bambang Yudoyono mai Timor-leste iha 19 Maiu, bele halo enkontru ministerial konjunta ba Timor-Leste ho Indonezia, ami sei avalia fali situasaun de markasaun fronteira tomak,” hateten Ministru da Costa, semana kotuk (23/03) iha nia knar fatin Pantai Kelapa, Dili.
MNE. Da Costa hatutan, iha tempu badak Embaixador Timor-leste iha Indonezia, sei halo dialogu ida entre Timor-Leste ho Indonesia antes tama loron independensia 20 de Maiu, oinsa para bele rezolve kestaun fronteira tomak.
Tuir Ministru da Costa, iha segment tolu mak to’o agora hetan konkordansia entre nasaun rua kona ba asina akordu iha tempu ne’eba.
Entertantu Deputadu Mario Viegas Carascalao hateten, atu rezolve kazu ne’e Governu rua ne’e tenke tur hamutuk hodi halo dialogu oinsa mak bele rezolve problema ne’e.
“Tuir hau nia hare pozisoens rai rua la’os kestaun Naktuka ne’e, importante mak ekonomikamente tanba militar nian ne’e la’e, ne’e kestaun prestizu,” hateten Deputadu Carascalao.
Deputadu Carascalao dehan, iha Indonezia nia tempu Naktuka ema la kestiona tanba iha momentu neba Timor-Leste mos pertense ba Indonezia.
“Uluk Indonezia nia tempu hau konsege rezolve duni problema rai iha fronteira nian, tanba iha tempu Portugues nian hau koinese tiha problema ne’e,” Deputadu Carascalao tenik.
