“Husu ba feto maluk sira labele tauk, hakat ba oin nafatin tanba feto mak edukadora, dame nain, lakohi nian oan sira sai at maibe hakarak ema hotu sai diak,” dehan Reis iha nia mensajen pas no dame nian iha serimonia jornada da paz ne’ebe hala’o iha Jardin Rosa Muki Bonaparte, semana kotuk (28/03) iha Mandarin, Dili.
Membru NGO Rede Feto ne’e hatutan, kontribuisaun feto ba dezenvolvementu nasaun nian mos importante, tanba ne’e keta tauk atu kritika bainhira iha buat ruma la’o la los.
“Feto labele nonok deit bainhira iha buat ruma la los, labele tauk hakilar ba lia los hodi hetan justisa ne’ebe justu,”Reis fo korajen.
Iha fatin hanesan Membru Grupu Feto Parlamentar, Deputada Fernanda Borges, hateten feto maluk sira iha kapasidade bo’ot, atu hametin domin, paz lliu-liu fo tulun ba oan (joventude) sira iha prosesu eleisaun nia laran atu mantein estabilidade no paz iha rai laran.
“Husu ba inan sira, fo atensaun ba tempu ida ne’e atu ajuda ita nia oan sira, liu-liu joven sira atu hakmatek, iha sentimentu domin bainhira partisipa iha prosesu eleisaun ho konsiensia rasik hodi hili lideransa ne’ebe ita hakarak, sai ita nia lideransa,” sujere Deputada Borges.
Tuir Deputada ne’e, feto iha obrigasaun atu garantia paz no estabilidade tanba sira lakohi nasaun ne’e iha tan violensia maibe hakarak sira nia familia no sosiedade sira atu moris ho paz no harmonia.
“Maluk feto sira, dala ida tan fo ida imi nia forsa no domin atu ita nia rai, bele duni foti ulun la’o nafatin ba oin ho forsa atu bele kaer metin soberania nasaun nian, nune’e ukun rasik an ida ne’e bele fo vantagen ba ita hotu liu-liu feto maluk sira,” Deputada Borges husu.
Nia hatutan liu katak populasaun 60% joven ne’e laos persentajen ne’ebe ki’ik entau mantein paz no estabilidade kualker situasaun tanba bainhira mosu violensia joven mak lakon barak liu.
