Tuir Comandante Polisia Tranzito Nasional, Inspector Xefe Antonia L.C. Soares hateten total asidente trafiku ne’ebe akontese durante eleisaun prezidensial hamutuk hitu.
“Kona ba asidente trafiku akuntese durante iha elisaun prezidensial, loron ida antes no mos loron ida ba iha elisaun nian iha 17 Marsu 2012 kazu asidente hamutuk 7, portantu iha kazu nebe maka rezulta kanek kma’an ne’e iha 6 no rezulta kanek todan ne’e iha ida,” dehan Inspectur Xefe Soares, iha nia knar fatin Kaikoli Dili, semana kotuk (20/03).
Komandante ne’e hatutan, durante eleisaun prezidensial laiha asidente ne’ebe rezulta ema mate no asidente hirak ne’e mai husi Distritu neen.
“Husi Distritu Dili iha asidente rua iha loron elisaun nian , Distritu Baucau ida, Ermera ida, Lospalos rua kanek kmaan, Manufahi ida deit no rezulta vitima ida ho kanek todan husi parte UNPOL nian tanba falta kontrolu,” dehan Xefe Soares.
Iha lidun seluk Membru Komisaun B Parlamentar, Deputadu Jose Teixeira, apresia ba servisu polisia tranzitu nian ne’ebe halo kontrolu maka’as durante elesiaun.
“ita hare pawai-pawai sira ne’e, iha movimentasaun nebe barak maibe numeru asidente ki’ik, ita tenki fo parabens ba polisia lalulintas sira, tanba sira konsege kontrola, no fo mos parabens ba partidu politik sira, kandidatu sira nian nebe halo kolaborasaun ida furak teb-tebes ho polisia sira,” dehan Deputadu Teisera ho orgulhu.
Deputadu ne’e mos husu ba motorist no kondutores sira atu kuidadu aan bainhira lori motor ka kareta iha estrada.
