Tuir observasaun Judisial System Monitoring Program (JSMP) katak, kazu nebe maka presentazen a’as iha Tribunal mak kazu Violensia Domestika (VD), Abuzu Sexual (AS), no kazu ofensas integradu fiziku domina iha Tribunal sira rai laran.
“Hau hanoin kazu hotu-hotu sempre sai prioridade JSMP ninian atu hare, kona ba kazu saida maka durante ne’e tama barak liu iha tribunal, ezemplu tuir hau nia observasaun kazu violensia domestika, abuzu sexual, no ofensa intregradu fiziku simples, kazu tolu ne’e maioria domina iha ita nia Tribunal sira, iha lista kazu tribunal ninian,” dehan Diretor JSMP Luis de Oliveira Sampaio, iha nia knar fatin, Colmera, semana kotuk (19/03).
Diretor JSMP Sampaio katak, JSMP tenke hare oinsa maka Tribunal bele atende kazu sira ne’e, no mos rezultadu saida mak sira foti.
“Justu ga la justu, ne’e sai hanesan servisu ida ba JSMP,” Diretor Sampaio tenik.
Entertantu Prezidente Komisaun A Parlamentar, Deputada Fernanda Borges, gava servisu JSMP nian tanba fo sai informasaun depois de halo monitorizasaun ba kazu ruma.
“Hau senti diak teb-tebes tanba JSMP halo monitorizasaun, fo sai informasaun ita bele hatene povu ne’e hetan duni asesu ba justisa ga la’e, hau hanoin ne’e diak tebes no sira bele hatene kazu saida mak as liu iha Tribunal atu nune’e informa ba komunidade hodi la bele repeta hahalok sira ne’e,” gava Deputada Borges.
Atual Prezidente Partidu Unidade Nasional (PUN) ne’e mos husu ba JSMP, atu foka mos ba buat sira nebe mak la’o la diak, “halo sumariu, regularius atu ita hare to’ok lei ida nebe mak ladun favorese ba ida ne’e atu nune’e bele hadia lei sira ne’e atu ajuda katak povu hetan no asesu duni ba justisa,” sujere Prezidente Komisaun A Parlamentar ne’e.
