Eskola agrikula mak eskola ne’eba prepara ema atu sai agrikultor ne’ebe diak, tanba durante iha eskola alende hetan teoria estudante sira mos halo pratika kedas iha terenu.
Eskolas agricultura oras ne’e iha ona iha Distritus hat – Manatuto (Natarbora), iha Bobonaro (Corluli), iha Lauten (Fuiluro) no mos iha Aileu.
Eskola agrikula, la’os deit ba mane maibe mos ba feto, hanesan estudante feto Delfina Maria Marcal ne’ebe iha entuziasmu tebes atu tama iha eskola ida ne’e tanba hakarak sai agrikultora ne’ebe diak iha futuru.
“Hau gosta liu tama eskola agrikula ne’e tanba hau hakarak sai agrikultora ne’ebe diak iha futuro e mos hau bele hanorin hau nia familia, liu-liu hau nia inan-aman atu oinsa mak halo to’os no natar ne’ebe diak no fo rezultadu diak,” hateten Estudante Agrikula Marcal, semana kotuk (20/03) bainhira partisipa iha lansamentu Programa Dezenvolvementu Rural ba dala hat (RDPIV) nian iha edifisiu Ministeriu Agrikultura e Peska, Comoro, Dili.
Tuir estudante segundu klase ne’e katak, kompara ho eskola sira seluk, eskola agrikula diak liu tanba depois de remata eskola, la abandona.
“Ita tama SMA bainhira tamat ita lahetan servisu, maibe tama eskola agrikula, ita hetan kedas servisu sai estensionista no la’os ne’e deit ita mos bele kria rasik ita nia jardin ida hodi kuda aihoris sira, no halo natar ka to’os tuir sistema moderno nian ne’ebe ami hetan durante iha eskola, ami bele aplika fali,” Estudante Marcal ne’e kompara.
Iha sira nia eskola konese ho sistema 583, katak tuku lima dader iha ona terenu atu pratika depois to’o tuku ualu,fila fali ba eskola, no tuku tolu lokraik ba fali pratika.
Entretantu estudante Rozina de Jesus Costa, hosi Distritu Liquiça, sente kontente no iha interese duni tama eskola ne’e tanba aprende buat barak kona ba agrikultura nian.
“Hau gosta tanba hau nia inan-aman petani nanis, no saida mak hau hetan no aprende iha eskola, tantu teoria no pratika, hau bele aplika fali iha hau nia to’os no natar laran, kuda batar no hare ne’ebe diak ne’e oinsa, inklui kuda aihoris sira,” dehan estudante segundu klase ne’e ho kontente.
Estudante Costa mos husu ba feto maluk sira ne’ebe agora sei iha eskola Ensino Baziku terseiru siklu nian, bainhira remata tama deit iha eskola agrikula.
Entretantu Diretor Nasional Agrikultura, Januario Marcal, hateten estudante sira iha eksola agrikula sei sai fini ne’ebe diak ba futuro.
“Ita bele dehan sira ne’e mak sai agrikultor ne’ebe diak iha future no mos bele apoia ba ita nia inan-aman agrikultor sira,” hateten Diretor Marcal.
