Tuir Officer Advokasia Working Women Center Timor-Leste (WWCTL), Ricar Pascoela katak durante ne’e mosu violensia barak hasoru Trabalhadora Domestika liu-liu iha area rurais ne’ebe uza sistema bolu malu deit, tanba sira la kompriende kona ba direitu no dever trabalhadores nian tuir Kodigo Laboral no Konstituisaun RDTL, tanba ne’e sira presiza treinamentu.
“Treinamentu ne’e importante tebes ba trabalho domestika sira, e iha treinamentu primeira faze ne’e atu hasa’e sira nia kapasidade no kuinesementu klean liu tan kona ba direitu no dever iha fatin servisu, tanba iha lei ida mak sei proteje sira nia direitu, presiza kompriende klean kona ba lei kodigu do trabalho no sira sei la mesak,” dehan Officer Advokasia WWCTL, Pascoela, semana kotuk (27/03) iha Salaun Yayasan Hak Farol, Dili.
Officer Pascoela haktuir, WWCTL nudar Organizasaun Non Governmental ne’ebe harii ho misaun sai inisiador, hodi haklaken direitu feto nian liu husi edukasaun, advokasia, suporta organizasaun feto ne’ebe hakarak servisu hodi hetan kondisaun moris diak iha futuru no vizaun luta ba partisipasaun feto iha mercado trabalho no haklaken direitu feto pronto atu kapasita no supporta trabalho domestika sira atu reklama sira nia direitu hasoru empregadas sira bainhira hetan violasaun.
Nia hatutan, treinamentu ne’e partisipa husi Trabalhadora Domestika (Pembantu Rumah Tangga) no servisu hein lozas husi distriut Dili no Ermera, durante loron rua no material ne’ebe sei koalia mak hanesan diretu no dever iha relasaun trabalho tuir lei kodigu laboral no konstituisaun RDTL.
“Trabalho infantil, hak wanita dalam bekerja terutama wanita hamil, direitu ba ema ne’ebe alezado,” Nia katak.
Programa treinamentu nee’ rasik hetan suporta husi APEDAH Timor –Leste.
Iha parte seluk, Partisipantes Imaculada Soares dos Santos, husi Distritu Ermera ne’ebe hala’o servisu hein labarik hateten treinamentu ne’e importante tebes ba sira nudar trabalhadora ne’ebe iha area rurais atu hatene klean konaba direitu no dever iha servisu fatin.
“Hau kontente tebes hola parte iha treinamentu ne’e tanba durante ne’e hau lahatene katak hau nia direitu iha servisu fatin, hau nia dever hau halao ona maibe hau nia direitu la tuir servisu ne’ebe hau halo entau ho treinamentu ne’e hau bele hatene klean konaba saida mak hau sei halo no saida mak hau simu bazeia ba akordu ne’ebe iha,” dehan trabalhadora Santos.
Santos ne’ebe sei eskola ne’e lasatisfas ho salariu ne’ebe nia hetan husi nia servisu, tanba kada fulan niasiimu deit US$30 tanba la sufsiente atu selu nia eskola.
Nia hatutan, maske nune’e nia labele koalia hasoru nia empregadas, tanba nia presiza servisu ne’e e nia rasik laiha konesementu atu oinsa mak bele reklmana nia direitu.
