Eleitores 500 ne’ebe Governu tula ho kareta Saneamentu nian iha 16 Marsu 2012, hodi tuir eleisaun prezidensial iha Distritu Oe-Cusse, agora abandona iha edifisiu Sekretariu Estadu Rejiaun Oe-Cusse (SERAO) hodi hein rezultadu husi Nasional atu tula hikas sira mai.
Eleitores ne’ebe maioria estudante ne’e lamenta tanba governu lori tiha ba tuir eleisaun maibe atu fila, Governu husik hela deit.
‘’Ami tuir lolos la mai ida, maibe Estatal mak tula ami ho truk saneamentu, hotu tiha ami mai sira nunka prepara kondisaun diak mai ami. Foin lalais iha Kinta ne’e ami mai to’o Mota-Ain, ekipa servisu fronteira sira la fo ami mai entaun ami toba deit iha Mota-Ain, ami la han buat ida so biscuit, ita bo’ot sira hanoin to’ok depois ami tuir tiha eleisaun sira lakohi mai tula ami fila,” lamenta Estudante husi Universidade Timor Oriental (UNITAL), Lorensiana Tasain, semana kotuk (20/03) iha Edifisiu SERAO, Distritu Oe-Cusse.
Estudante Tasain mos ameasa, katak bainhira Governu la fasilita transporte ba sira atu fila mai, sira se la tuir tan eleisaun tuir mai.
‘’Karik Governo la haruka kareta mai ,ami sei la partisipa eleisaun segundu ronde no Parlamentar, tanba ami lakon ami nia servisu, liu-liu nudar estudante konserteza terlambat materia. ita nuda sidadaun kumpri duni program Governo maibe Governo halo fali hanesan ne’e oinsa atu fiar,” kritika Estudante Tasain.
Preokupasaun hanesan hato’o husi Jasinto Ase katak,sira la kontente ho promesas Governu nian ne’ebe atu tula hikas sira mai depois de eleisaun maibe realidade Govenru husik abandona sira.
“Lideransa Governo balun promote tiha ami katak, depois tuir tiha eleisaun mak sira tula fali, afinal sira bosok tanba tuir rezultadu eleisaun provizoria hatudu katak kandidatus sira apoiu ne’e lakon entaun sira abandona tiha ami,’’ Ase deskontente.
Entrentantu Xefe Gabinete SERÃO, Jeferino da Cruz Sa’u, katak nia parte halo ona kontaktu ba nasional no husu atu kalma hodi hein rezultadu.
‘’Ita nia eleitores nebe maka foin lalais mai liu husi rai maran tenke kalma, hodi hein tanba sira mai ne’e ami mos la iha konesementu maibe ami tenta buka solusaun hodi kontaktu ona ba nasional,” Xefe Gabinete Sa’u husu.
Xefe Sa’u mos husu ba sira ne’ebe urjenti, bele fila ho transporte maritime Ro Nakroma ne’ebe halo operasaun dala rua semana ida.
