“Anin bo’ot nebe akontese akontese iha loron 17 dader san kuaze tuku ida kalan ne’e afeita komunidade nia uma barak mak estraga tanba ai tohar kona uma no mos anin sobu nebe ami halo ona asesmentu iha Baucau Vila laran hamutuk 130 familia,” hateten Fokal Point Komisaun DDMC Baucau, Nelson Abilio Soares Nunes, semana kotuk (20/3) iha edifisiu Administrasaun Distritu Baucau.
Tuir Fokal Point Komisaun District Dezastre Manajement Comunity (DDMC) Nunes, katak rezustadu asesmentu hala’o iha Baucau Vila deit, sub distritu seluk mak hanesan Baguia nebe hetan informasaun husi suku Alawa kraik total uma nebe hetan estragus 170 nebe hetan ona maibe sub distritu seluk sei halo nafatin asesmen.
“Ami halo ona koordenasaun entre distritu ho nasional, no ami informa ona uma nebe hetan estragus ba iha nasional, oras nee’e dadauk sasan emergensia tuir dalan ona too iha Baucau mak ami distribui ba vitima sira nebe uma anin sobu,” dehan Nunes.
Iha parte seluk Administrador Distritu Baucau Antonio Guterres hateten, udan no anin nebe mak akontese iha tuku ida kalan la’os akontese iha Baucau vila deit maibe teritoriu Administrasaun Baucau nian tomak, e Administrador Sub-distritu sira presiza halo levantamentu de dadus.
“Udan no anin foin lalais ne’e levantemantu dadus sosial agora la’o hodi halo levantamentu dadus, uma nebe ami identifika iha Wailli uma neen, Laga uma tolu, Buruma uma rua nebe iha estrada ninin maibe sira nebe do’ok husi estrada presiza halo indentifikasaun klaru,” esplika Guterres.
Sekretariu Estadu Dezastre Naturais, liu husi telefone ba Administrador ne’e katak, atu halo levantementu dadus dezastre naturais nian lalais, tan ne’e pontu vokal nebe iha distritu atu halo levantemantu dadus lalais.
“Udan no anin ne’e rezulta ema ida mate iha Wailili, nain rua seluk kanek, iha Laga ida mate, mota mos lori ema ida no ema nebe lori bero mout iha tasi seisal no hetan fali iha Laga, ema hirak ne’e mate tanba impaktu husi udan no anin nebe akontese foin lalais ne’e,” Administrador informa.
Iha fatin seluk tuir Komunidade Agustina Sarmento, katak anin bo’ot nebe akontese iha loron sexta kalan foin primeira vez akontese iha Baucau.
“Ami hare anin ne’e oin seluk tanba sobu ema nia uma barak no ai tohar barak, aat liu mak halo ema balun mate no mos mota lori ema nebe impaktu husi anin bo’ot nebe akontese iha Distritu Baucau,” dehan Komunidade Sarmento.
Nia husu ba governu liu husi Diresaun Ministeriu Solidaridade Sosial (MSS) atu fo antesaun ba dezastre nebe povu Baucau hasoru, atu fo ajuda umanitaria tanba oras ne’e tempu udan halo povu barak mak terus hodi tahan udan been no loron manas.
