Lei Pensaun Vitalisia ne’ebe mak lolos diskuti ona iha plenaria tanba tama ona iha ajenda Parlamentu, maibe tenke kansela tanba korum la to’o atu diskuti ba lei ne’e.“La priense korum be, labele diskuti lei ne’e hodi aprova,” hateten Deputadu Agosto Tara, semana kotuk, (20/03) iha Parlamentu Nasional.
Tuir Deputadu Tara, ema sira nebe mak iha direitu atu simu pensaun vitalisia ne’e mak ema ne’ebe servisu tinan barak nia laran, estadu rekonese sira liu husi pensaun vitalisia.
“Fo ba funsionariu publiku ne’ebe servisu to’o tinan 60, para nia bele moris,” Deputadu ne’e katak.
Entertantu tuir Deputadu Independenti, Mateus de Jesus katak, Lei Pensaun Vitalisia baixa tiha ona ba iha komisaun A iha semana kotuk maibe to’o oras ne’e dadauk sei iha prosesu nia laran.
“Depois iha neba mak foin despaisu ba iha plenaria hodi aprova nia final global iha Parlamentu,” Deputadu de Jesus dehan.
Deputadu ne’e hatutan, lei pensaun vitalisia, alende membru Parlamentu, mos bba membru governu sira hotu.
Deputadu ne’e haktuir, iha lei uluk nebe halo iha 2006 no 2007, kuandu ministru ida remata nia funsaun, nia hetan salariu 100 pursentu.
“Ida ne’e mak atu halo revizaun, husi 100 pursentu hatun ba 70 ou 60 pursentu ida hanesan ne’e,” tenik Deputadu independent ne’e.
Deputadu de Jesus afirma, se deit mak okupa tiha kargu politika nian ruma, nia iha direitu atu hetan pensaun.
“Nebe nia kompleta ona fulan 42 iha nia kareira ne’e, nia iha direitu atu hetan pensaun,” Deputadu de Jesus dehan.
