Semana tolu, komunidade Bairo Pite la asesu ba bee moos

Informasaun nebe mak membru parlamentu simu husi komunidade Bairo Pite katak, komunidade sira iha area neba durante semana tolu nia laran la asesu ba bee moos, tanba mota estraga tiha kanalizasaun bee moos nian.

“Ita sente katak,lor-loron povu ki’ik oan la’o liu husi ita nia uma oin buka bee tun sa’e-tun sa’e, ita nudar reprezentante senti ida ne’e buat ida ladiak,” hateten Deputada Gertrudis Moniz, iha plenaria Parlamentu semana kotuk,(20/03).

Deputada Moniz hateten, komunidade durante semana tolu la asesu ba be’e mos tanba mota estraga tiha kanalizasaun bee nian.
“Kuaze fulan ida tiha ona, mais to’o agora la hadia nafatin, nebe fo to’ok informasaun ba povu ida ne’e katak, kanu ne’e presiza tempu hira mak atu hadia,” Deputada ne’e preokupa.

Relasion ho ne’e, komunidade sira kuru deit iha mota e ida ne’e fo impaktu ladiak ba sira nia saude.
Iha fatin hanesan Deputadu Mario Viegas Carascalao hateten, Governu liu husi Ministeriu kompetente tenki halo planu urbanizasaun nebe redi dreinajen ninian.

“Komunidade la asesu ba bee moos, hau karik kandidatu ba Prezidenti hau sei hateten, hau nia pontu ida mak ne’e, hau sei influensia Governu , Dili estasoens bee nian ne’e iha fatin hotu-hotu para ema hetan bee,” Deputadu Carascalao dehan.

Tuir Eis Governador iha okupasaun Indonezia ne’e, katak dala barak Governu la tau atensaun maximu ba nesesidade povu nian.
“Labele hateten dehan hamenus kiak, hamenus kiak oinsa, atu hamenus kiak ema la iha bee ne’e atu hamenus kiak oinsa,” dehan Deputadu Carascalao ho lian husu.

Nia hateten, iha tempu uluk nian kuandu bee matan la iha dada araska oituan, maibe tempu agora uza deit makina hodi fura bee.

“Pur ezemplu sira iha Cabo Verde, sira bee araska oituan, sira buka bee iha rai okos sira ne’e depois uza mota bomb , e agora ema sira be hela iha foho tutun iha hotu bee moos,” hateten Deputadu ne’e.

Eis Vise Primeiru Ministru ne’e katak, diak liu Dili muda ba iha fatin sira nebe mamuk, besik bee atu nune’e ema hotu-hotu bele hetan bee, se la’e ema halai hotu mai iha Dili defisil atu kontrola.

“Portugues uluk halo planu ba Dili ne’e ba ema 50.000 deit ,dada kanal bee nian mos rihun 50.000 deit agora ita ema rihun atus rua resin hela iha Dili,” Deputadu ne’e kritika.
Wainhira TDW konfirma asuntu ne’e ba iha SAS maibe la konsege tanba Diretor Jeral Agua e Saneamentu la iha fatin.