“Antes Prezidente atu veto ou promulga, nia bolu mos sosiadade sivil atu hato’o nia preokupasaun, oinsa sosidade sivil hare kona ba lei tolu ne’e, no ami ba hasoru duni Prezidente no hau rasik halo aprezentasaun inklui kolega sira balun no komunidade Ermera rasik mos mai hasoru direitamente hodi koalia kona ba lei hirak ne’e,” dehan Inés Martins, Peskizador husi La’o Hamutuk, semana kotuk (26/03) iha
Lei tolu ne’e mak hanesan Lei Expropriasaun, Lei Rejime Especial, no lei Fundo Financeiro Imobiliário.
Tuir Peskizador Martins, katak Prezidente la promulga lei ne’e tanba lei ne’e fo liu benefisiu bo’ot ba Governu no sei fo desvantajen barak ba povu.
“ Lei ne’e fo direitu bo’ot ba estadu atu kaer rai barak no hetan rai barak la konsidera ema nia direitu nebe maka uluk hetan,iha tempu antes Portugal no Indonezia tama foti ema nia rai, ne’e la konsidera ignora tiha husi lei ne’e,” kritika Martins.
Nia hatutan, iha lei ne’e mos la konsidera ema nebe mak uzu kapiaun espesial, ema ne’e bele hetan pose,no iha direitu ba rai ida.
“Liu husi pose katak nia hela tinan 20, nia tama iha fatin ida pasifika, tama ho publiku, tama husi 31 Dezembru 1998 bele hetan direitu ba rai ne’e. maibe pose ne’e la garante tanba wainhira iha problema rai no lori ba Tribunal, Tribunal sei rekunhese liu direitu nebe mak iha sertifikadu iha tempu Portuges no Indonezia, entau lei ne’e favorese ba se,” Peskizador Martins dehan ho lian husu.
Entertantu Prezidente Ezersisiu Parlamentu Nasional, Maria Paixao ladun hatene katak lei ne’e tama fali ona iha PN atu halo diskusaun fali.
”Hau rona maibe hau seidauk iha kunesementu dehan lei ne’e mai ona ga seidauk, hau rona katak Prezidente Ramos Horta la promulga lei ne’e, tanba hasoru komunidade barak no sira barak mak protesta, entau lei ne’e sei fila-fali mai Parlamentu,” dehan Prezidente Ezersisiu PN, Paixao.
Tuir prosedimentu iha Parlamentu Nasional ne’e, tenki ajenda foun fali halo apresiasaun foun e depois vota fila-fali mak foin fo ba Prezidente Republika hodi promulga, Vise Prezidente PN ne’e dehan.
