Hosi trabalhador Timoroan nain 67 ne’ebe desloka ba Korea du Sul iha 12 Marsu 2012, nain rua haruka fila hikas mai Timor-Leste tanba detekta moras Sifilis.
“Antes trabalhadores sira ne’e aranka, ami lori sira ba doutor sira iha Ospital Nasional Guido Valadares (HNGV) atu halo ezame mediku. Iha ezame mediku ne’e hatudu rezultadu diak, laiha moras maibe to’o iha Korea tuir fali ezame mediku, detekta fali sira nain rua hetan moras Sifilis, ne’ebe hau lahatene,” hateten ho konfuzaun Director Nasional Emprego, Paulo Alves, semana kotuk (19/03) iha Sekretaria Estado Dezenvolimentu Professional no Emprego (SEFOPE) iha Kaikoli, Dili.
Tuir informasaun ne’ebe SEFOPE hetan husi kompania katak sira nain rua bele servisu maibe atu halo tratamentu ba sira nia saude lei imigrasaun Korea do Sul la premite.
“Hau hanoin SEFOPE iha obrigasaun atu selu tiket trabalhadores sira atu fila mai Timor-Leste bainhira hetan falha iha Korea do Sul maske osan ne’ebe SEFOPE iha selu deit ba tiket, atu sira ba Korea maibe ho problema hanesan ne’e tenke esforsu duni,” Diretor Allves dehan.
Trabalhadores nain rua ne’e fila hikas iha loron 16 Marsu, trata sira nia moras, depois de diak sira bele fila fali ba Korea do Sul atu kontinua sira nia servisu ne’ebe sira asina kontratu tiha ona.
Iha parte seluk Sekretariu Jeral Konfederasaun Sindikatu Timor-Leste (KSTL), Rigoberto Monteiro, hateten problema ne’e mosu tanba sistema ezame mediku Timor-Leste ho Korea mak la hanesan.
Nia haktuir tan tanba ne’e governu iha responsabiliza atu haruka trabalhador nain rua ne’e fila mai Timor-Leste atu halo tratamentu to’o sira nia kondisaun diak.
“Se ema nia lei la fo dalan ba trabalhadores ida ho kondisaun moras atu hala’o servisu iha ema nia rain ita labele obriga entau governu iha obrigasaun atu haruka fila no atu kontrola sira ne’ebe halao servisu iha Korea du Sul,” SJ Monteiro dehan.
Nia hatutan hare ba numeru trabalhadores Timoroan iha Korea do Sul ne’ebe kontinua aumenta, KSTL mos koko ona atu halo ligasaun ho KSTL iha Korea do Sul, nune’e bele halo monitorizasaun ba sira iha ne’eba.
Nia afirma, importante tebes ba joventude Timor-Leste sira atu aprende esperiensia nasaun dezenvolvidu hodi kontribui ba dezenvolvimentu nasaun Timor-Leste.
“Atu labele akontese tan problema hanesan iha futuru presiza hadia sistema ezame mediku iha Timor nian,” nia sujere.
