Nudar instituisaun governu ne’ebe responsabiliza ba programa formasaun professional empregu inklui haruka trabalhadores Timor oan ba servisu iha Korea Sekretario Estado Formasaun Profesional e Emprego (SEFOPE), Bendito Freitas hato’o mensajen ba trabalhadores katak hatudu imajen no hamorin Timor-Leste nia naran iha Korea de Sul hanesan nasaun foun ida tanba komportamentu importante tebes atu hetan respeitu husi nasaun seluk.
“ Fo hanoin ba imi labele forma fali grupo iha Korea atu baku malu hasoru trabalhadores husi nasaun seluk, liu-liu husi Indonezia tanba ita iha Padre SDB husi Kefa ne’ebe hala’o servisu iha ne’eba sira mak sai aman ba trabalhadores Timoroan no Indonezia,” lia menon SE, Freitas, semana kotuk (12/03) iha serimonia despedida ad ala 52 ba trabalhadores nain 67 iha Kaikoli, Dili.
Tuir SE. Freitas, improtante mak trabalhadores sira tenke kumpri kontratu ho Banku Nasional Ultra Marino, liu-liu kaixa jeral deposito katak selu fali osan kreditu ne’ebe sira deve.
Iha parte seluk Diretor Nasional Asuntu Consulares iha Ministeriu Negosiu Estrangeiru (MNE), Crisongo de Araújo hateten dokumentus viazen importante tebes tanba prezensa trabalhadores Timoroan iha Korea hanesan ema estrangeiru ka reprezenta nasaun.
“Imi tenke lista naran ba kordenador grupo hodi aprejenta ba ita nia embaixador atu halo update ba imi nia kondisaun servisu no saude hanesan hetan moras ruma informa kedas ba iha embaixada ka familia sira labele hein to’o grave,” dehan Diretor de Araújo.
Diretor ne’e husu, bainhira sente servisu todan demais, informa kedas ba iha embaixador no adidu hodi buka dalan seluk labele foti desizaun mesak sai trabalhadores illegal tanba ne’e bele hamosu problema bo’ot no polisia imigrasaun bele kaer.
MNE pronto atu kopera ho Embaixada Timor-Leste iha Korea no SEFOPE atu fo asistensia ba trabalhadores sira durante hala’o servisu iha estrangeiru.
Enkuantu total trabalhadores Timor oan ne’ebe SEFOPE haruka ona ba iha Korea du Sul hamutuk 818 pesoas e sira ne’e servisu iha area peska, fabrika no agrikultura e husi numeru ne’e nain 33 mak fila ona mai Timor.
“Ho razaun balun hetan deportasaun, servisu todan no nain ida mate entau trabalhadores ne’ebe agora dadaun hala’o hela servisu hamutuk nain 785 inklui mos nain 67 ne’ebe aranka iha dia 12 Marsu. Iha dia 19 fulan Abril sei iha trabalhadores nain 32 mak sei aranka ba iha Korea de Sul hala’o servisu iha area ne’ebe hanesan,” hateten Diretor Nasional Empregu, Paulo Alves.
