Membru Parlamentu Nasional preokupa tebes salariu kondutor ba kareta Deputadu sira nian ne’ebe fulan ida liu ona.“Tansa mak kondutores sira ami nian seidauk simu osan, sira mos iha fen no oan atu fo han,” preokupa Deputadu Estanislao da Silva, semana kotuk (12/03) iha plenaria Parlamentu.
Eis Ministru Agrikultura e Peska ne’e lamenta, tanba Deputadu sira simu tiha osan maibe kondutor sira seidauk .
“Sira mos iha direitu moris, direitu mos hodi hare sira nia familia no fo han ba sira nia oan sira, e ami husu ba meja parlamentu atu tau matan lalais ba sira nian salariu,” Deputadu ne’e husu.
Entertantu Vise Prezidenti Parlamentu Nasional, Maria Paixao hateten nia parte hato’o ona asuntu ne’e ba iha Sekretariu Parlamentu nian maibe orsamentu husi Ministeriu Finansas nian seidauk tun.
“Semana kotuk sira fo informasaun dehan tun tiha ona maibe to’o iha finansas la dauk tun, e agora tezoreiru ba fali ona atu bele hare,” Deputada Paixao tenik.
Deputada Paixao mos promete katak, iha semana ida ne’e nia laran kondutor sira bele simu ona sira nia osan.
