Hafoin asina akordu entre governu Australia no Timor-Leste liu husi Sekretariu Estadu Formasaun Profesional e Empregu (SEFOPE), iha dia 01 Dezembru 2011, halo lansamentu ba Timor oan nain neen hodi loke odomatan ba programa servisu temporariu iiha Broome-Australia.
“Ohin hala’o lansamentu ba primeiru grupu trabalhadores Timor oan ba Australia, sira sei ba servisu iha Hotel ida naran Keybel Beach Hotel iha sinku estrela, Sim atu garantia sira nia direitu ami sei haruka adidu ida ho baze kamera hodi fo atensaun ba sira,” dehan Sekretariu Estadu, Bendito Freitas, semana kotuk (08/03) iha Kaikoli, Dili.
SE. Freitas dehan, alende akordu ne’ebe iha, Primeiru Ministru foin dadauk hasoru malu ho Primeira Ministra koalia mos kona ba projetu ne’e e SEFOPE nudar tekniku professional kontinua prepara juventude ho rapido.
“Iha dia 09 de Marsu trabalhadores nain neen sei ba uluk hala’o servisu iha area hospitalidade kontratu ba fulan neen, espera katak ba oin grupu balun sei ba tan,” SE.Freitas esperansa.
Tuir Sekretariu Estadu, atu garantia direitu trabalhadores sira nian iha Australia, SEFOPE sei monta adidu ida iha ne’eba, atu kopera ho Embaixador Timor iha Australia hodi fo protesaun diak ba trabalhadores sira.
Iha lidun seluk Embaixador Australia iha Timor-Leste, Miles Armitage, sente haksolok ho Timor oan nain neen ne’ebe hetan uluk oportunidade atu hasa’e sira nia kunesementu iha area Hospitalidade iha Australia hodi hadia sira nia moris iha futuru.
“Hau fo parabens ba trabalahdores nain neen hanesan grupu primeiru ba programa pilotu servisu temporariu, ne’e aumenta tan dimensaun foun ba relasaun diak entre Timor –Leste no Australia,” dehan Embaixador Armitage.
Tuir Embaixador Armitage, programa ne’e importante tebes ba Timor-Leste no Australia tanba bele fo benefisiu ba nasaun rua ne’e, e espera katak iha fulan Julhu mai Timor –Leste bele sai trabalhadores permanente iha programa pilotu temporariu ne’e.
Iha oportunidade hanesan, Reprezentante Trabalhadores Timor oan, Joana Lopes Amaral hateten, sira pronto atu fahe esperensia ne’ebe sira iha durante halao servisu iha Australia ba maluk joventude sira ne’ebe lahetan oportunidade atu kontribui ba dezenvolvimentu pais ida ne’e.
“Ami hato’o ami nia agradesementu ba governu Australia ne’ebe fo ona oportunidade ba ami atu aprende esperiensia iha Australia, ami pronto atu kontribui ba dezenvolvimentu ekonomia nasaun Timor –Leste no Australia,” dehan Trabalhador Amaral.
