Tuir Vise Prezidente Komite 12 de Novembru, Rogerio Castro da Cruz katak planu atu hari monument ba joventude sira ne’ebe mate iha 12 Novembru 1991, lakonsege realiza tanba failansu husi governu maske taka tiha ona plaka.
“Governu promete iha 2011 atu inagura e planu sira ne’e ami ejizi bebeik ona maibe to’o agora la realiza,” informa Vise Prezidenti Komite 12 de Novembru, da Cruz,semana kotuk,(09/03) iha Balide, Dili.
Tuir da Cruz, Komite hein deit informasaun husi governu kona ba implementasaun ba monument ida ne’e.
“Dezenu halo iha ona, so ke to’o agora ami la rona informasaun husi Governu e sira tau hela deit plaka, ema liu ba liu mai hare deit mak plaka,” da Cruz preokupa.
Entertantu tuir Deputadu Francisco Branco katak, lolos monumentu halo hotu ona maibe to’o agora sidauk avansa buat ruma tanba failansu husi Governu nian hanesan mos failansu iha fatin hotu-hotu.
“Orsamentu ano fiscal tau tiha ona osan maibe to’o agora ita lahare buat ida, entaun ida ne’e hatudu saida, hatudu failansu husi Governu,” Deputadu Branco dehan.
Deputadu husi Bankada Fretilin ne’e hatutan, konkursu ba dezenu halo tiha ona liu husi prosesu ne’ebé transparente maibe to’o agora la hare nia prosesu la’o ba oin.
Nia hateten, Governu nia mandate besik remata ona maibe monumentu 12 Novembru la konsege halo.
“Hatudu katak ,la fo prioridade ba monumentu ida ke monumentu Nasional, tuir lolos fo atensaun especial, tanba akontesementu ne’e trajedia ida ne’ebé maioria massa ne’ebé sai martire iha neba mesak joven deit,” Deputadu ne’e katak.
Iha fatin hanesan Deputadu Mario Viegas Carascalao hateten, maske Governu ida ne’e la konsege halo maibe Governu foun mai bele implementa tanba monumentu ne’e importante tebes ba futuru Timor nian.
“Ema barak mak mate iha neba, mundu hatene katak Timor situasaun hanesan ne’e hela ne’ebé mak bapa sira oho ema barak,” Carascalao dehan.
Eis Prezidente Partidu Sosial Demokrata (PSD) ne’e dehan, liu husi trajedia 12 Novembru mak loke dalan ba Timor nia independensia.
“Sekarik Governu ida ne’e la biban, entaun Governu oin mai tenki halo duni, mais hau hanoin ulun bo’ot sira hein deit ezekusaun deit karik,” eis Governador tempu okupasaun Indonezia ne’e katak.
