Selebrasaun loron internasional feto, alende fahe premius ba Ministeriu ka Sekretariu Estadu ne’ebe halo promosaun igualidade jeneru ho diak, mos ho animasaun teatru kona ba vitima violensia domestika no sexual nian ne’ebe hala’o iha Convention Centre Dili iha dia 08 Marsu foin lalais ne’e.
Teatru husi grupu Santo Antonio Kampu Alor Dili ne’e ho tema ‘ Dansa Igualidade Jeneru’ ne’ebe sai reflesaun ba partisipante sira ne’ebe partisipa iha serimonia ne’e.
Partisipante sira triste no tanis bainhira hare kona ba lalaok moris vitima violensia domestika ne’ebe hatudu iha teatru ne’e.
“Ami sente kontente no triste tanba iha teatru ne’e hatudu duni feto nia terus tanba sistema patriacal ho esforsu ne’ebe iha sira hakotu an husi sistema partiacal ne’ebe hanehan sira to’o ikus hetan duni igualidade jeneru katak feto mos bele kontribui ba dezenvolvimentu nasaun hanesan mane,” dehan Prezidente Board Rede Feto, Ivete de Oliveira, semana kotuk (08/03) iha Centru Convensoens Dili.
Nia hatutan katak teatru ne’ebe grupo Santu Antonio hatudu ne’e soke ema wain nia fuan no hanoin lalaok moris vitima violensia bazeia ba generu. Tuir nia katak ne’e laos teatru ne’ebe arbiru maibe hatudu duni realidade ne’ebe feto sira sente no infrenta iha sira nia familia uma laran durante ne’e.
Tuir fontes Konfirmadu ne’ebe asiste direitamente teatru ne’e hateten katak teatru ne’e hatudu realidade ne’ebe feto sira iha mundu no liu-liu iha Timor –Leste sira sente. Liu husi teatru ne’e bele mos fo motivasaun ka exemplu diak ida ba feto sira liu-liu iha Timor-Leste atu halo reflesaun ida ba an katak feto mos bele fo kontribuisaun ba dezenvolvimentu nasaun bainhira fo oportunidade.
“Hau espera katak liu husi teatru ne’e governu bele halo reflesaun ida hodi fo atensaun diak liu tan ba asuntu iqualidade generu liu –liu fo protesaun diak liu tan ba direitu feto no labarik iha pais ida ne’e,” dehan Fontes Konfirmadu.
Nia hatutan katak koalia konaba igualidade generu feto no mane iha direitu hanesan iha seitor saida deit. no feto laos inimigu mane nian maibe sai parseiru mane nain hodi dezenvolve nasaun ida ba futuru.
