Oras ne’e dadauk feto mos hatudu ona sira nia abilidade iha area hotu-hotu inklui iha area desportu feto barak mak hetan progresu diak kompara ho uluk.
”Medalia osan mean nebe maka ita hetan iha Sea Games tanba partisipasaun feto iha jogu uluk-uluk, sira nia kontribuisaun maka’as, katak involvement feto iha setor desportu la’o ho diak,” hateten Sekretariu Estadu Joventude e Desportu (SEJD) Miguel Manetelo,semana kotuk (07/03), bainhira partisipa iha seminariu loron mundial feto, iha Salaun Delta Nova, Comoro, Dili.
Tuir S.E Manetelo, katak atu dezenvolve feto foinsa’e sira iha setor ida ne’ebe integradu, Sekretaria Estadu Promosaun Igualidade (SEPI) tenke halo linha kordenasaun ne’ebe diak ho ministeriu hotu, inklui SEJD.
“Hanesan agrikultura tanba feto balu agrikultur, balu iha area desportiva, no feto balu halo hela emprezariu ki’ik, ne’e duni tenke iha linha koordenasaun,” SE Manetelo sujere.
Iha biban hanesan Diretor Jeral SEPI Thomas da Silva konkorda ho Sekretariu Estadu Manetelo katak involvement feto iha area desportu maka’as no hetan rezultadu diak.
“Hau hare governu, ajensia sira, NGO sira ne’e hotu-hotu agora fo hela suporta ba ida ne’e, nebe rezultadu foin lalais iha desportu ne’e, rezultadu ne’ebe kapas tebes, tanba iha Sea Games ne’e justru feto maka hetan medalia de ouru nebe ita hare katak ne’e progresu diak no feto mos hatudu sira nia abilidade,” hateten Diretor Jeral da Silva.
Diretor da Silva hatutan, agora dadaun iha Federasaun Futebol Timor-Leste (FFTL) komesa fo ona oportunidade ba feto sira atu involve iha areaida ne’e.
“Promove feto iha setor hotu-hotu agora dadaun komesa iha ona no feto sira mos iha ona konsensia rasik atu enkoraza sira nia an,” Diretor ne’e dehan tan.
