Udan no anin bo’ot ne’ebe akontese iha Tersa-feira (13/03) rezulta Ro Ariki ne’ebe para iha Palasiu Governu oin baku fila tanba laloran tasi bo’ot halo tali jangkar kotu tiha.
Tuir Komunidade Juliao da Costa ne’ebe momentu ne’e tur hela iha fatin ne’eba, hateten Ro Ariki baku fila iha tuku 06:00 lokraik kuazu metru 100 iha tasi laran.
“Ami mos tur hela iha baki leten mak derepenti udan no anin bo’ot, ro ne’e nia tali kotu mak laloran baku tan monu to’o mai iha Palasiu oin ne’e,” hateten Komunidade da Costa, semana kotuk (14/03) iha Palasiu Governu nia oin.
Tuir Komunidade da Costa, maske la rezulta ema mate ka kanek maibe ema nain rua ne’ebe iha hela ro laran konsege haksoit sai ba tasi laran.
Ro Ariki mak ro ne’ebe bai-bain tula ema turista sira hodi la’o pasiar iha tasi laran, katak Komunidade da Costa.
Entertantu Bernardino Gomes (ema nebe mak haksoit sai husi ro ne’e) hateten,ro ne’e hetan baku fila tanba anin makas no tali ro nian ne’ebe kesi iha tasi laran kotu.
“Ami nain rua ho hau nia kolega Mario Alexo mak iha ro laran maibe la kanek, ami nain rua konsege haksoit tun,” Gomes tenik.
Enkuantu patraun ba ro Ariki ne’e mak patraun Tiger Fuel, Gomes afirma.
Iha fatin hanesan Mario Alexo, nudar Marineru katak, maske la rezulta ema kanek ka mate maibe sasan sira iha ro laran la aproveita no aat hotu.
Tuir Marineiru ne’e katak, Patraun ba hare tiha ona no hein atu Ro bo’ot bele dada sai Ro Ariki ne’e husi fatin ne’eba.
