Iha selebrasaun loron internasional feto nian, Sekretaria Estadu Promosaun Igualidade (SEPI) mos fahe premius ka fo valor ba servisu Ministerial ka Sekretariu Estadu ne’ebe durante tinan lima nia laran halo promosaun igualidade jeneru,e Ministeriu Agrikultura e Peska (MAP) mak sai primeiru lugar tanba konsege promove igualidade jeneru ho diak.
“Sira merese hetan primeiru lugar tanba iha tinan 2008 sira halo rekunesementu ba abordajen integradu de jeneru iha Ministeriu laran, no relatorio analiza jeneru iha irigasaun, manual formasaun lideransa feto iha tomada desizasun agrikultura, no ekstensionista official seguransa alimentar no superior, iha tinan 2009 to’o 2011 sira halo draf politika jeneru iha agrikultura no iha tinan 2010 to’o 2011 halo peskiza kona ba jeneru iha agrikultura,” dehan Sekretaria Estadu, Idelta Maria Rodrigues, semana kotuk (08/03) iha Centru Convensoens Dili.
SE. Rodrigues haktuir, iha 2011 pursentu 26 feto husi agrikultura no ema 1.819.000 hetan treinamentu kona ba implementasaun pratika diak iha produsaun no iha 2012 sira halo orsamentu jeneru ho montante US$ 500.000 ne’ebe aprova husi Parlamentu Nasional.
“Uza ba produsaun fehuk ropa husi grupo feto iha 37%, no feto hetan benifisiariu hamutuk 25.145 simu ekipamentu agrikola,” hateten SE.Rodrigues.
Tuir Sekretaria Estadu, ministeriu ka sekretariiu estadu ne’ebe halo promosaun igualidade, SEPI identifika hamutuk 17 maibe sira ne’ebe tama iha primeiru lugar to’o 10 mak hetan premiu.
Nia afirma, Ministeriu ne’ebe mak hetan premiu mak hanesan Ministeriu Agrikultura e Peskas (MAP), Ministeriu Ekonomia e Dezenvolvimentu (MED), Ministeriu Solidaridade Sosial (MSS), Ministeriu Edukasaun (ME), Ministeriu Justisa (MJ) no Ministeriu Saude (MS).
Enkuantu Sekretariu Estadu mak, Sekretariu Estadu Formasaun Professional e Empregu (SEFOPE), Sekretariu Estadu Defeza (SED), no Sekretariu Estadu Seguransa (SES).
Iha lidun seluk Diretor Jeral MAP, Lourenço Borges Fontes hateten katak premiu ne’ebe SEPI fo ba sira nian ministeriu ne’e, atu hatudu ba ema hotu katak MAP iha atensaun ba involvimentu feto iha agrikultura.
“Ami nia servisu ne’e atu halo ekilibre entre feto no mane, la’os atu hetan premiu tanba ne’e la’os ami nia intensaun maibe se SEPI dehan merese hetan ami simu e ba futuru servisu Ministeriu sempre involve feto diak liu tan,” katak Diretor Jeral Fontes.
DJ, Fontes hatutan,iha sira nia ministeriu iha Xefi Departementu 86, no Diretor nain 24, enkuantu feto nain neen mak iiha pozisaun diak hanesan Xefi Departementu.
“Sira nain neen tama iha kategoria servisu maka’as ba dezenvolvimentu ho hanoin diak no sira kontinua fo korajen ba feto sira atu prepara an didiak hodi kompete ho mane bainhira hetan oportunidade promove iha pozisaun ruma,” DJ fontes informa.
