Tuir Sekretaria Estadu Promosaun Igualidade (SEPI), Idelta Maria Rodrigues katak luta ba igualidade jeneru la fasil, tanba ne’e presiza kontribuisaun husi entidade tomak inklui mos estadu.
Selebrasaun loron internasional feto, tinan ne’e SEPI hili tema ‘Partisipasaun Feto Foinsa’e iha Dezenvolvementu Nasional’ ho objetivu atu hasa’e sira nia konesementu iha area igualidade jeneru tanba foinsa’e sira mak sei lori dezenvolvementu nasaun nian ba future.
“Ita bo’ot sira tenke kuda duni sensibilidade ne’ebe mutua no iha duni responsabilidade ba asuntu jeneru, nune’e bainhira tama iha prosesu dezenvolvimentu labele hakfodak ho asuntu ida ne’e maibe kontinua servisu no luta ba asuntu ne’ebe ita koalia fasil, maibe luta ba igualidade jeneru la fasil,” Sekretaria Estadu Rodrigues dehan tan.
Nia afirma,Timor-Leste hanesan nasaun nurak ne’ebe foin harii, presiza baze ida ne’ebe forte ba area igualidade jeneru iha seitor hotu.
Nia hatutan,importante tebes atu inkorajen joven sira hodi kompriende papel iha sosiedade nia le’et, hodi investe ba dezenvolvimentu nasaun nian.
“Foinsa’e feto no mane atinji ona pursentu 50 mak hetan ona kursu atu hasa’e abilidade iha Sekretariua Estado Formasaun Profesional e Empregu, maske feto ladun bo’ot maibe komesa ona fo oportunidade ba feto sira hola parte iha prosesu abilidade,” Sekretaria Estadu tenik.
Iha lidun seluk Diretor Jeral Ministeriu Agrikultura e Peskas, Lourenço Fontes hateten partisipasaun feto iha setor hotu sei menus tanba ne’e husu foinsa’e feto atu prepara aan didiak ba future.
“Husu ba foinsa’e feto sira, preparasaun ba imi importante hahu agora imi mak autor ba dezenvolvimentu nasaun nian ba futuru tanba kompetisaun iha mundu global luan tebes tanba ne’e eskola la’os matenek deit maibe domina lingua,” Diretor Jeral Fontes sujere.
Iha seminariu ne’e, alende SE. Rodrigues ne’ebe sai Oradora, iha mos Oradora husi Indonezia, artista e mos Membru Parlamentu Indonezia Marisa Haque iha nia palestra hateten iha familia balun la fo tempu ba feto atu dezenvolve nia kapasidade.
Tuir Haque, moris sei sai diak liu tan bainhira la’en no fen iha konkordansia atu buka osan hodi sustenta familia uma laran.
“Tuir lei Indonezia nian, la’en buka osan fahe ba fen no oan maibe kuandu fen buka osan ba nia an rasik entau diak liu tan nune’e hodi kontinua eskola no hola nia presiza no labele depende ba la’en,” dehan Membru Parlamentu Indonezia ne’e.
Enkuantu tuir Orador Ikang Fawzi (la’en husi Marisa Haque) husu ba foinsa’e feto no mane sira iha Timor-Leste, atu sai lideransa ne’ebe hakuak ema hotu no bele responde nesesidade ema hotu nian ho aten brani.
