Sekretaria Estadu Promosaun Igualidade (SEPI) Idelta Maria Rodrigues hateten, tinan ne’e sira sei fo atensaun maka’as liu ba iha joventude no feto foinsa’e atu hasa’e liu tan sira nia konesementu kona ba igualidade jeneru.
“Importante tebes atu hare implementasaun Dili komprimisiu, hare mos politico, estrategia sira ne’ebé iha area igualidade jeneru, liu-liu ba jventude sira atu oinsa mak sira hatene no promove igualidade jeneru,” dehan SE.Rodrigues, semana kotuk (08/03) bainhira selebra loron internasional feto iha Salaun Dili Convention Centre, Dili
.
Iha biban hanesan Diretora Uma Hakmatek Psychosocial Recovery And Development In East Timor (PRADET), Luiza Marcal, hateten selebrasaun loron internasional feto ba tinan ida ne’e ema barak mak partisipa kompara ho tinan kotuk.
“Ne’e katak iha buat ruma mak atria sira atu partisipa tanba ne’e ba oin, ita servisu hamutuk hodi promove igualidade jeneru, hodi dezenvolve feto sira, liu-liu feto klosan sira,” Diretora Marcal ne’e katak.
Diretora Marcal mos husu ba SEPI atu servisu hamutuk ho parseiru sira hotu, atu oinsa mak bele hadia mentalidade feto foinsa’e sira,liu sira ne’ebe agora dadaun servisu iha area ida ne’e, atu enkoraza feto sira seluk hodi foti nasaun ne’e ba oin.
