Trabalhador Timor oan iha Korea la satisfeitu hahalok Empregador

Lamentasaun nebe mak Membru Parlamentu Nasional simu via telephone katak,Trabalhador Timor oan ne’ebe servisu iha Korea du Sul lamenta tebes ba atitude empregador sira ne’ebe trata sira ladun diak no duni trabalhador sira.

“Kadaves baku sira ho ai, no obriga sira tenke sai husi fatin ne’ebe sira servisu hodi ba fali fatin seluk, sira moras sira rasik mak ba halo tratamentu, ida ne’e problema bo’ot ida no estadu presiza tau atensaun ba sira,” levanta Deputadu Natalino dos Santos, semana kotuk (12/03) iha plenari PN.

Tuir Deputadu dos Santos, katak oras ne’e dadauk trabalhador barak mak sai ona husi sira nia servisu tanba patraun trata sira ladiak.
Entertantu Membru Komisaun H  Parlamentar, ne’ebe trata asuntu Juventude, Desportu no Formasaun Proffesional, Deputadu Elizario Pereira, hateten trabalhador Timor oan nebe mak ba servisu iha Korea, bazea ba akordu ne’ebe nasaun rua asina iha 2005.

“Trabalhador sira nebe mak ba tenke hetan konesementu diak, tratamentu nebe mak hanesan ho sidadaun rai ida neba ninian, e obedese rai nebe mak sira ba ne’e,” Deputadu Pereira katak.
Deputadu ne’e afirma, governu presiza hatene tanba sa mak patraun hare trabalhador Timor oan ladiak.
“Sira ba ne’e mak seidauk iha skill ou sira ba ne’e mak ladun kumpri ema nia regra ga,ou keta sira la hetan formasaun adekuadu ka oinsa, presiza hatene,”Deputadu ne’e rekomenda.

Deputadu ne’e mos husu ba trabalhador sira atu mantein sira nia servisu, atu nune’e bele hetan benefisiu ne’ebe diak ba sira nia an inklui mos ba nasaun.
“Sekretariu Estadu Formasaun Profesional tenke servisu maka’as, liu-liu adidu trabalhador ita nian  nebe iha Korea, atu halo bebeik reuniaun, hasoru malu bebeik supervijiona ba aktividade nebe mak trabalhador sira nian atu nune’e bele fo hatene ema nia regulamentu ba sira,” Deputadu Pereira rekomenda.

Empregador sira labele halo ita nia trablahdor sai hanesan atan iha Korea Governu Timor-Leste ho Governu Korea tenki hasoru malu bebeik atu nune’e bele hato’o regulamentu Korea nian ba Trablahdor Timor oan sira.
“Maibe trata ita nia trablhador hanesan ema nebe hakarak atu aprende hodi fila fali mai servi iha ita nia rai,ida ne’e mak esensial,”

Iha fatin hanesan Deputadu Alberto da Silva Cruz dehan, Komisaun H tenki ivestiga lolos ba problema ne’e atu nune’e bele fo ajuda ba trabalhador sira.
“Tenke investiga tanba regras iha tiha ona, lei ami aprova tiha ona, atu fo sansaun ba ema ne’e ita hare oinsa,” dehan Deputadu da Cruz.

Entretantu bainhira TDW koko konfirma asuntu ne’e ba Sekretariu Estadu Formasaun Profesional e Empregu maibe la konsege tanba ,Sekretariu Estadu Bendito Freitas okupadu hela.