Sekretaria Estadu Promosaun Igualidade (SEPI), Idelta Maria Rodrigues apresia tebes ba Membru Parlamentu Foinsa’e (PF) ne’ebe maioria feto, ne’e hanesan motivasaun ida ba Estadu Timor-Leste atu inkorajen foinsa’e sira atu asesu ba edukasaun tanba sira mak sei lori nasaun ne’e ba futuru.
“Hau haksolok ho Parlamentu Foinsa’e ne’ebe kompozisaun feto bo’ot, diak tebes maibe importante mak kuda joventude sira ho kualidade atu ita investe ho baze ne’ebe fundamental ka fo duni atensaun ba ema hotu,” apresia SE.Rodrigues, semana kotuk (07/03) iha Salaun Delta Nova, Comoro, Dili.
Maske nune’e, tuir nia, importante tebes ba sira atu akompanha no asiste progresu ou obstaklu ne’ebe joventude feto no mane sira infrenta iha pais ida ne’e tanba sira hanesan parlamentu foinsa’e, ho oportunidade ne’ebe iha aproveita didiak atu fo duni atensaun ne’ebe diak iha asuntu jeneru no sai modelu ne’ebe diak ba joventude sira seluk.
“Joventude tenke kreatividade no buka informasaun atu aumenta kunesementu konaba area igualidade jeneru tanba ne’e importante tebes,” SE. Ridrigues dehan.
Nia informa liu katak iha Ministeriu Edukasaun iha ona kurikulum jeneru atu fo ba estudante sira nune’e iha futuru labele hakfodak ho asuntu jeneru.
Parlamentu Foinsa’e kompostu husi joventude ho idade 12 to’o 17 husi 13 Distritus ne’ebe pasa iha selesaun atu aprende sai lideransa ne’ebe diak iha futuru. Total Membru PF hamutuk 130 pesoas kompostu husi mane 62 no feto 68.
“Ho numeru ne’ebe iha signifika katak membru Parlamentu Foinsa’e feto barak liu entau ami mos bele promove igualidade jeneru iha parlamentu Nasional nia laran,” dehan reprejentante parlamentu foinsae, Sandra.
Iha fatin hanesan Prezidente Conselho Nasional Joventude Timor-Leste (CNJTL), Leovigildo Hornai hateten foinsa’e sira agora ne’e dezenvildu lalais tanba ne’e nudar foinsa’e feto Timor hatudu matenek no tradisaun nudar feto Timor nune’e mos sai feto no mane ida ne’ebe iha interese luta ba dezenvolvimentu nasaun nian labele sai feto ne’ebe ba diskotika.
“Parlamentu Foinsa’e CNJTL no Governu mak estabelese hau iha buat tolu ba sira mak hanesan ida labele kaben sedu, rua labele hakotu eskola no labele involve iha partidu politiku tanba imi nia idade seidauk to’o imi sei sai lideransa diak iha futuru,” dehan Prezidente CNJTL Hornai.
