Tribunal Distrital Dili (TDD) halo julgamentu ba kazu motorist arguidu Epolino de Oliveira ne’ebe laiha Karta Kondusaun (SIM), bainhira lori motor no bainhira Polisia Tranzitu prende tiha motor husi arguidu maibe arguidu haksesuk malu fali ho polisia.
Akontesementu ne’e akontese iha area Kaikoli nian, iha dia 09 Marsu foin lalais ne’e. Iha momentu ne’eba II Komandante Tranzitu Distrital Dili, Inspektor Asisten Matias da Costa hapara tiha arguidu nia motor no SIM ba nia, maibe arguidu haksesuk fali ho polisia.
“Ami halo cek point iha tuku 09 : 00 kalan ne’ebe ami hetan irmaun ne’e ho numeru sapa matrikula 3301, nia la fo nia SIM maibe haksesuk fali, tuir ita nia kodigu penal ne’e krimi ona,” hateten II Komandante da Costa, iha julgamentu TDD iha Mandarin, Dili.
Julgamentu ne’ebe diriji husi Juiza Presidente Anna Paula no Reprezentate husi Ministeriu Publiku Prokurador Jose Landin, no arguidu hetan defeza husi Advogadu Denis Lazerda.
Polisia da Costa konta, arguidu haksesuk malu fali ho Polisia, no wainhira husu xavi arguidu lakohi fo, ho ida ne’e ho obriga deit foti xavi husi arguido nia liman no arguidu atu baku fali, ne’e duni polisia deside lori arguidu ne’e ba iha tribunal no prosesu tuir lei ne’ebé vigora iha Timor-Leste.
“Nia hasesuk malu fali ho hau, tanba hau dehan ida ne’e krimi ona antaun hau husu xavi maibe nia la fo, antaun hau hadau husi nia liman deit, no halo kapturasaun depois ami halo prosesu tuir lei ne’ebé maka figora iha rai laran,” dehan Segundu Komandante Transito Distrital Dili Inspector Assisten Matias da Silva.
Entretantu arguido Epolino de Olveira, simu hotu akuzasaun ne’ebé maka Juiza lee sai ba nia, katak los duni halo hanesan buat ne’ebé maka Juiza lee sai ba nia.
“Hau laiha karta kondusaun duni no hau foin lori motor iha tinan kotuk fulan Maiu, hau la trata hau nia karta kondusaun tanba hau osan laiha,” dehan arguidu.
Juiza Paula iha nia dezisaun final desidi katak arguido de Oliveira tenki selu multa $60 no bele foti fali nia motor tanba juiza determina kazu ida ne’e kazu kaman.
