Maske iha Sentru Votasaun balun iha Distritu Oe-Cusse ema ladun iha, maibe iha Sentru Votasaun Masin ema nakonu, liu-liu joventude sira antuziasmu tebes tuir eleisaun prezidensial nian iha 17 Marsu foin lalais ne’e.
Qebo ne’ebe foin primeira vez tuir votasaun iha tinann ne’e, sente kontente no antuziasmu tebes hodi hili lideransa ne’ebe nia hakarak.
‘’Ne’e hanesan momentu diak ida mai hau nudar foinsae, atu involve an iha eleisaun hodi hili ita nia Prezidente da Republika ba periodu 2012-2017,alende ida ne’e mos hanesan pertama kali hau tuir elisaun.joventudi ka sidadaun diak tenke tuir elisaun ita maka sai matan dalan ba ema hotu,’’ Joventude Qebo dehan.
Qebo mos apela ba sidadaun hotu, liu-liu foinsae sira hotu atu labele husik liu oportunidade murak ne’e hodi hili no fihir lideransa nebe mak bele hakoak ema hotu.
“Hau husu ba ita hotu, atu hili didiak ita nia presidente iha loron ohin ,tanba ho loron ida ne’e ita hili sala karik tinan lima tan maka ita foin hili fali ,ba kandidatus presidente sira ne’ebe maka la eleitu atu simu rezultadu ne’ebé mak iha,” katak Joventude Qebo.
Iha fatin hanesan Mario Keno, Joventude husi Suku Costa, husu ba prezidente eleitu atu tau matan ba ba foinsae sira hodi loke kampu servisu.
‘’Hau husu ba prezidente eleitu atu tau matan mai ami foin sae sira hotu keta ibun koalia deit katak joven maka futuru nasaun maibe la prepara kondisaun, oinsa maka bele futuru ne’e diak,” katak Joventude Keno.
Xefe Estadu eleitu mos tenke halo relasaun diak ho nasaun hotu, liu-liu nasaun vizinu sira hanesan Indonezia, Australia, Malaysia, no Nova Zelandia nune’e bele iha pas no dame iha rai laran.
Sorin seluk Fransisco Soares, Joventude husi Santa Rosa hateten foinsa’e sira presiza kria unidade, pas no harmonia iha rai laran.
‘’hau hakarak hateten deit katak, atu ita nia nasaun nia dezenvolvementu ne’e la’o ho diak persija ita hotu nia kontribuisaun ,sei ita joventudi maka la kria Unidade oinsa los atu ita nianai ulun sir ne’e konserta ba programa dezenvolvementu,” Soares dehan.
