“Sira labele simu keixa direitamente tanba sei Ministeriu Justisa nia okos, e ami aprezenta tiha ona rekomendasaun ne’e ba Ministerio Justisa maibe seidauk hetan rezultadu,e ita espera katak hafoin prezensa Estado Timor-Leste iha Genebra iha dia 16, sira bele adopta,” dehan Reprejentante Safe the Children, da Silva, semana kotuk (14/03) iha Salaun St. Paulo Kuluhun Dili.
Tuir da Silva, iha artigu 11 iha Konvensaun Direitu Labarik nian, koalia kona ba estatutu no independensia (KNDL) atu fo asistensia maximu ba asuntu labarik nian.
Nia hatutan, koperasaun KNDL ho sosiedade sivil sira la’o diak ho papel fahe informasaun no sosializasaun ba komunidade no labarik hetan progresu diak.
“Maibe atu influensia orgaun estado sira hanesan ministerio sira atu hamosu asaun implementasaun rekomendasaun sira seidauk diak tanba papel KNDL seidauk forte, sosiedade sivil nudar organizasaun ne’ebe tau matan ba labarik sei esforsu maka’as ho KNDL atu halo advokasia ba estado hodi bele implementa rekomendasaun sira ne’e,” Nia katak.
Iha parte seluk Kordenador Programa Protesaun Labarik, Xisto Gonçalves, hateten papel KNDL seidauk forte atu simu keixa ruma husi violasaun direitus labarik tanba estatute KNDL sei iha Ministerio Justisa nia okos signifika katak KNDL nehan laiha.
“Ami (FTM) ho membru koligasaun Konvensaun direitu ba Labarik nafatin halo advokasia ba estado para hatur lalais ou halo amandamentu ba estatutu KNDL bazeia ba rekomendasaun Universal Periodik Review (UPR),” dehan Gonçalves.
Nia hatutan katak KNDL durante ne’e barak liu halo deit divulgasaun konaba direitu labarik ba komunidade sira, hare ba situasaun ne’ebe iha katak KNDL labele halo intervensaun ba kada ministerial hanesan Ministerio Saúde, Ministerio Edukasaun, Ministerio Solidaridade Sosial, inklui mos Ministerio Justisa no sira la tau iha konsiderasaun tanba KNDL nia papel la forte, maske ho situasaun difisil Sosiedade sivil sira ne’ebe luta ba direitu labarik nafatin halao advokasia no hakilar ba estado atu hatur KNDL nudar instituisaun Indepedensia hanesan Prokurador Direitus Humanus no Justisa (PDHJ).
