Involvementu feto iha vida Forsa Defeza Timor-Leste (F-FDTL) foin atinji 3 pursentu, maske nune’e tuir Sekretaria Estadu Promosaun Igualidade (SEPI) Idelta Maria Rodrigues katak Instituisaun F-FDTL mos komesa promove ona igualidade de jeneru.
“F-FDTL loke oportunidade ba feto, husi recrutamentu F-FDTL 3% mak feto, no komposisaun fungsionariu feto iha administarsaun defeza e seguransa iha pursentu 14,” dehan SE. Rodrigues, iha Salaun Centru Convensoens Dili, semana kotuk (08/03).
Tanba ne’e,sira merese duni hetan premiu kona ba implementasaun igualidade jeneru iha sira nia instituisaun laran.
Sekretaria ne’e hatutan, F-FDTL mos halo ona dialogu ho Xefi Estadu Maior Jeneral F-FDTL ho Komandante sira kona ba promosaun igualidade jeneru iha sira nia Instituisaun laran.
“ Fo mos treinamentu ba sarjentu sira kona ba jeneru baziku nomos kona ba violensia bazea ba jeneru,” dehan SE. Rodrigues.
Entretantu tuir membru Grupu Feto Parlamentar Timor-Leste (GMPTL) Deputada Virginia Ana Belo, katak ne’e progresu bo’ot ida kona ba igualidade jeneru iha institusaun hotu-hotu.
“Ne’e progresu ne’ebé maka diak tebes-tebes par depois bele fo mos motivasaun ba feto sira seluk iha teritoriu tomak para sira mos iha kunesementu katak buat ida forsa ne’e la’os mane sira nian deit maibe iha oportunidade ba feto,” dehan Deputada Belo.
Deputada ne’e mos husu ba F-FDTL atu kria kondisaun ba feto, katak atu respeita feto nia kodrat nudar feto.
“Wainhira kuandu feto tama iha forsa maske implementasaun servisu hanesan maibe tenki kria kondisaun ne’ebé especial ida ba feto,” Deputada Belo sujere.
