“Importante tebes ba membru koligasaun sira atu hatene no komprende konaba rekomendasaun husi Child Right Committee (CRC) no Universal Periodik Reviw (UPR) tanba rekomendasaun rua ne’e konaba asuntu labarik atu bele halo advokasia ba governu konaba asuntu labarik,” dehan kordinador programa protesaun labarik, Xisto Gonçalves, semana kotuk (14/03) iha Salaun St. Paulo Kuluhun Dili.
Nia hatutan katak recomendasaun UPR mak rekomendasaun ba tinan hat konaba asuntu direitus umanus geral ne’ebe hare husi komisaun direitus umanus no bainhira nasaun ida sai ona membru ONU tenke aprejenta relatorio UPR konaba situasaun direitus umanus iha sira nia rain rasik, ida seluk konaba rekomensaun CRC ne’e koalia konaba direitus umanus labarik ne’ebe hare husi committee direitus labarik.
Iha lidun seluk, Justor Programa direitus labarik iha organizasaun Save the Children, Justino Da Silva informa katak treinamentu ne’e importante tebes ba sosiedade sivil liu husi koligasaun konvensaun direitu labarik tanba sira mak servisu iha area tau matan ba mekanismu internasional hanesan rekomendasaun UPR no CRC atu hakerek relatorio ba tinan hat presija tebes kuinesementu no kapasidade ne’be masimu.
“Atu hakerek relatorio ida ba tinan hat hodi submete ba Genebra ne’e presija tebes kuinesementu ne’ebe klean konaba mekanismu sira ne’e no kapasidade masimu,” dehan Da Silva.
Nia hatutan katak ho relatorio sira ne’e mak ema bele hatene papel estado no sosiedade sivil nian ba mekanismu internasional liu-liu relatorio UPR no CRC, no importante mos ba sosiedade sivil sira atu sai forsa politika no halao infuensia ba implementasaun rekomendasaun iha Timor –Leste.
Treinamentu ne’e halao durante loron ida ho balun hetan partisipasaun masimu husi organizasaun non governmental sira ne’ebe sai hanesan membru koligasaun direitus labarik ne’ebe durante ne’e luta ba direitus labarik nian iha Timor-Leste mak hanesan Forum Taumatan (FTM), Save the Children, Sistem Monitorizasaun programa judicial (JSMP), Plan Internasional, Forum Comunikasi Joventude.
