“Ajenda tiha ona desde Segunda- feira (19/03) maibe la iha korum e ohin mak konsege vota ho prezensa 39 deputadus, nebe mak vota ba iha levantamentu imunidade iha 36 deputadus, ida abstensaun, ida mak lakohi vota,” hatetenVise Prezidenti Parlamentu, Maria Paixao, semana kotuk (20/03).
Vise Paixao dehan, karta imunidade ne’e sei haruka ba iha Tribunal katak, Parlamentu Nasional hasai tiha ona imunidade Ministra Justisa Lucia Lobato no bele halo ona julgamentu ba nia.
“Hasai imunidade ne’e to’o nia prosedimentu hotu, se julgamentu ne’e katak la sala, nia bele asumi fali nia kargu hanesan Ministra Justisa,” Vise PN Paixao dehan.
Tuir Paixao, PN labele deside katak sala ou la’e, tanba ne’e kompetensia Tribunal nian e sira mak sei deside liu husi julgamentu.
“Parlamentu ida ne’e atu foti nia imunidade votu eskritu signifika katak,votu iha kaisa, depois vota hotu tenki maioria absoluta,” Vise Paixao tenik.
PN mos sei hasai imunidade ba membru governu balun ne’ebe involve iha kazu ruma “Ami sei la halo diskriminasaun, ami sei ajenda tan membru governu balun, sei halo levantamentu hotu,” Deputada husi Partidu Sosial Demokratika (PSD) ne’e dehan.
Tuir relatorios ne’ebe fo sai iha media Minister Lobato hetan akuzsaun halao koluzaun ho kompanhia ne’ebe manan tender atu harii fatin rejistru sivil walu iha 2009 ho valor US$1 milhaun.
Iha fatin hanesan Deputadu Arao Noe, agradese ba Deputadu sira hotu ne’ebe vota afavor hodi hasai imunidade Ministra Lobato nian, ho nune’e nia bele tuir prosesu julgamentu iha Tribunal tuir kazu ne’ebe nia komete.
Alende ne’e Ministra Lobato mos hato’o ona karta rejigna aan ba Primeiru Ministru no Primeiru Ministru aseita tiha, hodi nia bele konsentra ba iha prosesu julgamentu iha Tribunal.
Entretantu Deputadu Bankada Fretilin, Inacio Moreira la vota hodi hasai imunidade Ministra nian, ho razaun katak, membru Governu balun kazu tama kleur tiha ona iha Parlamentu maibe la hasai nia imunidade maibe kazu Ministra Justisa Lucia Lobato ninian foin maka hetan akuzasaun iha fulan ida ba kotuk Parlamentu hasai kedas nia imunidade.
“Hau la iha interferensia ruma maibe problema mak ne’e prosesu ne’e tenki tutuir malu labele haksoit ba mai,” Deputadu Moreira kritika.
Nia kestiaona tanba kazu balun halo prosesa lalais no balun la tau iha konsiderasaun.
“Ida ne’e mak halo hau rejeita lakohi ba vota.” n
