Reprezentanti Komunidade Palaban, Sucu Costa, Sub-Distrito Pante Macasar, Kalisto Babo semana kotuk (05/03) hateten katak hahu iha fulan Novembro 2011nis suku la acsesu be’e tanba la iha kombustivel ba gerador iha be’e-matan Samoro atu bomba be’e ba komunidade.
“Problema be’e mos iha ami nia fatin ida ne’e kuaze akontese iha fulan Novembro tinan kotuk, maibe nunka hetan solusaun hosi Governo. Ami hato dala barak ona ba SAS [Servisu Agua no Saneamentu] sira hatan ami dehan katak mina ba jerador nian maka la iha tamba deit ETO la iha perparasaun mina,” Reprezentante Babo hateten tan.
Nia eziji ba SAS Distrito Oé-cusse atu kopera hamutuk ho konsumidores atu buka kontribuisaun sosa mina ba jerador hodi fornese be’e ba komunidade atu hatan nesesidade lor-loron nian.
“Ami pronto atu rezolve hanesan fo osan ba hola mina naran katak sira tur hamutuk ho ami. Ami aseita hamutk ho lideransa Aldeias no Sucus para halo kontribuisaun tamba ita nia governo ne’e sei rezolve problema prioridade seluk,” nia haktuir tan.
Iha parte seluk Reprezentanti Komunidade Samoro Vicente Da Costa hateten wainhira udan tun rai be’e matan iha Samoru kontaminado ho be’e merak halo komunidade hemu be’e ne’e mos la diak.
Hatan ba preokupasaun komunidade Palaban no Samoro Responsavel Tekniko SAS Distritu Oé-Cusse, Gil Da Costa, hateten katak problema menus be’e mos iha Palaban sira pronto atu tur hamutk ho komunidade atu buka solusaun ba kestaun ne’e.
“Ami hosi SAS pronto kualker sa loron, atu tur hamutuk, atu buka solusaun ba problema menus be’e mos ne’e; naran katak konsumidores sira maka foti inisiativa atu halo kontribuisaun,” Responsavel SAS Da Costa hateten.
Entertantu nia mos hanoin katak problema asessu b abe mos iha Samoro bele rezolve iha tempu badak.
“Ba problema be’e Samoru ita espera katak iha tinan 2012 ne’e sei hetan rezolve hosi apoiu doadores Banku Dezenvolvmentu Asiatiko (ADB) tamba foin lalais ne’e sira halo ona observasaun no foti sampel atu halo estudu. Espera tempo badak bele implementa,” Tekniko Da Costa informa.
