Relasiona ho kareta Deputadu balun nian agora la funsiona tanba aat, membru Parlamentu Nasional husu atu halo manutensaun ba kareta hirak ne’e, nune’e bele fasilita sira nia servisu ho diak.
“Hau nia kareta aat fulan ida tiha maibe ate agora la halo manutensaun, tanba ne’e hau hakarak husu ba Parlamentu atu hadia kareta sira ne’e,” hateten Deputada Virginia Ana Belo, semana kotuk (05/03) iha Uma Fukun, Dili.
Deputada Belo mos lamenta tanba ekipamentus kareta nian atu halo manutensaun seidauk iha. “Hau lahatene interese saida mak iha laran, kareta Mitsubishi ba hadia fali iha Toyota e depois nia prosesu naruk teb-tebes,” Deputada husi Bankada Congresu Nasional Rekonstrusaun Timor (CNRT) ne’e lamenta.
Tuir Deputada ne’e, bainhira kareta ne’e lori ba iha ofisina maibe ema labele hadia tanba kareta modelu Toyota laiha pesa.
“Hau hanoin sekretariadu tenke hare buat sira ne’e para depois para rezolve netik buat ida ne’e,” Deputada Bela husu.
Entertantu Vise Prezidenti Parlamentu Nasional, Maria Paixao informa katak, ba kareta Parlamentu nebe mak atu halo manutensaun tenke halo pedidu eskrita ida para haruka ba Xefi Bengkel.
“Depois hau despaisu para atu bele hadia,” Deputada Paixao sujere.
