Hafoin membru Komisaun C Parlamentar halo fiskalizasaun iha Distritu Suai, identifika katak estrada barak mak aat los iha Distritu ne’e maibe laiha projetu emerjensia ba estrada ne’e.
“Ezemplu ida mak hau fo iha Mota Mola, Zumalai ninian bee komesa tama fali Kampung Baru nebe mos iha uma lubuk ida mak ameasa,” hateten Vise Prezienti Parlamentu Maria Paixao, semana kotuk,(28/02).
Vise Prezidenti Paixao husu, presizamente Governu liu husi Ministeriu Infraestruturas tenke halo projetu emerjensia lalais atu nune’e bele proteje estrada ne’e.
“Hau hanoin presiza tau bronjon iha mota ibun ne’e, para bele proteje Kampung Baru nebe agora iha neba hetan ameasa tebe-tebes, tanba hela deit metru ida mota atu sobu,”Paixao sujere.
“Tuir lolos Xefi Rejional iha neba para atu aprova karik projetu emerjensia ruma, Administrador ho nia Sekretariu rasik no Administrador Sub-distritu sira nunka tau ain iha neba,” nia preokupa.
Tuir ida ne’e hanesan, halo diskriminasaun ba Distritu Suai, tanba estrada kuak mesak bobot deit maibe la hetan projetu emerjensia.
Entretantu Deputadu Bankada Fretilin, David Dias Ximenes hateten, dalabarak projetu emerjensia sira halo iha distritu sira maibe la kleur at fali tanba la iha moru protesaun.
“Estrada fali iha Baguia ne’e problema bo’ot, hau lahatene hau atu koalia tan saida, ba fali Wakala sira ba halo lori trator sira ba hotu neba mais sira lakohi rona povu,” Deputadu ne’e kestiona.
Nia hatutan, komunidade sira kestiona makas tanba halo projetu ne’e la iha valeta halo estrada sai estragus fila fali ona.
“Horseik hodi bainrua hau tenki la’o fali kilo metru lima, la iha buat ida hau biasa la’o duni,” nia katak.
Iha fatin hanesan Deputadu Natalino dos Santos hateten, bainhira estadu la tau matan ba ponte Mola, iha tempu badak nia laran ponte ne’e sei kotu.
“Ida ne’e grave teb-tebes hau koalia tiha ona Sekretariu Estadu Obras Publika, mais to’o oras ne’e seidauk iha mandamamentu ba ida ne’e,” nia katak.
Wainhira TDW koko konfirma asuntu ne’e ba iha Ministeriu Infrastrutura maibe la konsege tanba Ministru Pedro Lay desloka tiha ona ba estranjeiru no seidauk fila.
