Rezultadu fiskalizasaun ne’ebe membru Komisaun E halo iha Distritu Viqueque kona ba veteranus nian katak, veteranus iha Distritu ne’e lamenta tanba foti dadus tuir sistema familia no partidus.“Hanesan ema hateten ba ami, ami Viqueque ne’e agora veteranu mak veteranu du partidu no veteranu ba familia, veteranu ba estadu laiha,” hateten Deputadu Ozorio Florindo iha semana kotuk,(14/02).
Deputadu Florindo hateten, problema veteranus sai nafatin komplikadu e Governu tenki foti desizaun ruma kona ba problema ne’e.
Tuir nia, iha Distritu Viqueque ema nebe la’os veteranus naran sai fali iha lista veteranus ninian maibe sira lakohi protesta malu.
“Sira dehan ami protesta malu, imi fila tiha ami iha ne’e oho malu problema se mak rezolve, ne’e mak hau dehan se imi lakohi protesta malu, imi sai veteranu hotu, imi sai traidor hotu, imi sai funu nain hotu dala ida tanba imi lakohi hateten lia los,” Deputadu ne’e tenik.
Deputadu ne’e sujere ba Parlamentu, Estadu, Governu no mos Partidus Politiku hotu-hotu,presiza resolve lalais problema ne’e.
“Maibe se ita hakarak dehan veteranus ba partidu, veteranu ba familia Parlamentu bele halo diak liu ba ita hotu, konsensu ba mos la rezolve ida,” Deputadu ne’e katak.
Entertantu Deputadu Adriano do Nascimento hateten, lei veteranus nian diak maibe ema nebe servisu iha komisaun ne’e mak presiza tau atensaun ba sira.
“Ne’ la’os akontese deit iha Distritu ida maibe ne’e akontese iha Distritu 13, husi Sub-distritu to’o suku ne’e akontese,” Deputadu Nascimento katak.
Nia hateten iha veteranus balun nia partisipasaun hatun hotu tanba partidu la hanesan.
“Hau hanoin la presiza kestiona sobre lei maibe buka dalan para atu kaer sira nebe hatun ema nia durasaun luta nian, haruka Polisia kaer sulan tiha tanba provoka instabilidade,” nia sujere.
Alende ne’e familia Martires Antonio Mau fuik nian nebe la fo sai nia identidade , lamenta tebes ba servisu komisaun sira nian, tanba maske nia maun nian osan sai tiha ona iha Distritu Suai maibe la simu.
“Hau nia maun nia osan aprova iha 2009 ho ninia rekening mos maibe tanba sa mak la simu, lei aprova ema nia dokumentus dala ida deit la’os dala rua,” lamenta familia Martires Antonio ne’e.
Tuir fonts konfirmadu ne’e, Martires Antonio nian hamutuk US$2.760 tama tiha ona Distritu Suai maibe la simu e komisaun husi Distritu neba haruka fali mai iha Dili simu osan ne’e iha Dili maibe la konsege nafatin.
“Hau mai iha Dili mos hanesan ne’e deit maibe osan tama iha Suai sira la fo,sira dehan o ba foti hotu iha Dili deit,Familia vitima ne’e dehan.
Nia lamenta tanba lei nebe mak Parlamentu aprova ne’e la los hakarak mak sama ema.
“Ita Timor ukun an laos hanesan ne’e,ita lakohi hakarak ema sama ita,to’o ita ukun an ita hakarak sama malu nafatin ,ne’e lalos,” nia tenik.
Fontes konfirmadu ne’e hateten, Martires Antonio Manu Fuik ne’e ninia maun rasik mate tanba Militar Indonesia mak oho iha tempu okupasaun iha 1975.
