Secretariado Tecniko Administrasaun Eleitoral (STAE) aprezenta buletin de votus no aseitasaun fotografia ne’ebe atu uza iha buletin de votu tanba tuir regra, sistema eleitoral buletin de votus ne’e folha ida deit.“Lei dehan katak fotografia livre escolhido ho simbolu ne’ebe reprezentante sira hatama ona,” hateten Diretor Jeral STAE Tomas do Rosario Cabral, semana kotuk (21/02) iha nia knar fatin STAE Kaikoli, Dili.
Tuir DG STAE Cabral kuando Comisaun Nasional Eleisoens (CNE) iha intervensaun ba kandidatura ruma STAE sei koalia ho fali kandidatus sira atu halo mudansa ba buletin de votus ne’e.
“Kuando boletin de votus ne’e pronto ona ita hein deit ona avansa ba loron ne’ebe determina ona atu halo eleisoens,” nia katak.
DG Cabral hatutan eleisaun ida ne’e sei uza deit ona pregu atu tu’u kuak iha kotak ne’ebe iha no la uza ona lapizera atu halo tanda silang.
“Tanba eleisaun ne’ebe akontese iha tinan kotuk liu ba matebian João Carascalao protes maka’as tanba uza lapizera la’os atu halo votasaun maibe hakerek ho liman ne’ebe la diak nian deit iha buletin nia laran.”
Iha parte seluk Deputada Josefa Alvares Soares, FRETILIN, la konkorda ho buletin de votus ne’ebe iha tanba simbolu uluk hafoin foto no nia hakarak foto uluk hafoin simbolu .
“Hau hakarak husu deit katak husi reprezente balun hateten ita bazeia deit ba lei maibe tanba saida mak husi kandidatura balun la lori simbolu,”Deputada Soares kritika.
Hatan ba kestaun ne’e DG STAE Cabral katak kandidatus la os obrigado atu tau simbolos.
“Ami la obriga kandidatus sira atu hato simbolu tanba tuir lei fotografia livre escolhido ida ne’e mak ami presiza,” nia hatan.
