Comisario CNE Distritu Oé-Cusse Abdula Sagran iha nia diskursu hateten katak objektivu hosi asina Paktu Unidade ne’e atu mantein Pas no Estabilidade iha povu Oé-usse nia let, maske ida ne’e la signifika katak durante ne’e povu moris iha atitude violentu nia laran.
“Hau fiar katak la iha sermonia ida ne’e mos Oé-Cusse moris iha Dame no Pas iha nafatin iha komunidade Oe-usse nia let. Realidade ne’ebé hatudu iha eleisaun sira tinan lima liu ba. Hau nunka hare iha problema ida mosu iha Oe-usse nia let, maibe sermonia ida ne’e atu hametin Dame iha ita nia let,” Comisario Sagran hateten tan.
Comissario Sagran reforsa tan katak dame no pas la os mai hosi ema seluk tamba ne’e nia husu ba lideres partido politko atu respeitu ba malu.
Entertantu Administrador Distritu Oé-Cusse Jose Tanesib Anunu hateten katka Festa Demokrasi ka Elisaun laos bua foun ida mai Timoroan sira no katak importante maka lideransa sira tenke iha komitementu atu simu realidade manan ou lakon atu nune garantia pas no dame lao tuir paktu unidade ne’e halo ona.
“Elisaun ne’e laos buat foun ida mai ita Timoroan. Tuir esperensia ho Indonesia ita halo dala barak no tama mai fase hamrik mesak kuase ita halo dala hat ona tamba ne’e esperensia sai sasukat ida atu nune lideransa hotu sai Dewasa atu hatene simu manan no lakon hodi atinji objektivu Pas no Dame,” Administrador Anunu dehan.
Iha parte seluk reprezentanti Komandante Polisia Nasional Timor-Leste (PNTL) Distrito Oé-Cusse, Herman Metan, hateten katak PNTL Distritu Oe-Cusse pronto ona atu asegura seguransa molok no depois de elisaun no tuir planu sei aloka membru polisia kada sentru sei iha elementus nain ne’en.
“Ami PNTL pronto ona atu ezekuta ami nia kanar 24 oras durante tempo kampanha to’o elisaun remata maibe husu ba entidade hotu atu kopera hamutuk waihira tempo elisaun lao,” Ajente Metan hateten.
