Ho eleisaun jeral Prezidensial ne’ebe sei hala’o iha 17 Marsu fulan ne’e, no atu garante seguransa ba povu tomak durante eleisaun, Sekretariu Estadu Seguransa (SES) prepara ona Radio Komunikasaun (HT) 250 ba Polisia Nasional Timor-Leste (PNTL).
“Sosa hotu ona e hein deit para bele fahe ba iha fatin sira ne’e,” hateten Diretor Jeral SES,Guilhermina F.S Ribeiro, semana kotuk (16/02), iha Vilaverde, Dili.
Tuir Diretora Ribeiro, katak HT 30 sei fahe ba iha Unidade Polisia Fronteira (UPF) iha Distritu rua nune’e sira bele hala’o sira nia servisu ho diak liu tan liu-liu iha tempu eleisaun nian e HT hirak ne’e ho marka 338 PLUS.
Maibe tuir nia,Distritu Oecuse Radio Integradu seidauk tama tan tuir informasaun katak sira nia IT altura Governu kontratu ba kompania nebe atu estabele Radio HT ne’e orsamentu la to’o entaun Oecuse sira la konsege estabelese iha neba.
Entertantu Deputadu Domingos Mesquita hateten maske besik ona eleisaun maibe radio HT ba Polisia sei menus.
“Problema Radio Komunikasaun ,problema ida kleur ona,sira halo instalasaun to’o iha nebe ona,ita hare katak, Sekretariu Estadu Seguransa dehan iha ona alokasaun orsamentu ba instalasaun komunikasaun ninian,” Deputadu ne’e kestiona.
Nia dehan orsamentu nebe mak Parlamentu aprova ona iha 2011 no 2012 espera katak,sitema komuniakasaun ninian bele prepara didiak ona antes tama ba eleisaun.
“Sistema komunikasaun bele prepara didiak ona anteas ita tama ba eleisaun atu nune’e polisia sira bele fasilita sira nia komunikasaun liu-liu iha area Fronteira no mos iha teritoriu laran tomak atu nune’e bele komunika ba malu wainhira problema ruma mosu,” Mesquita esperansa.
