Tuir Diretora Jeral Sekretariu Estadu Seguransa (SES) Guilhermina F. S. Ribeiro hateten, Radio Komunikasaun (HT) nebe mak oras ne’e dadauk Unidade Polisia Fronteira uza hamutuk 60 unit no radio iha baze iha 25 unit.Maibe tuir nia mos katak HT hirak ne’e husi UNTAET nia tempu kedas no depois de sira intrega poder ba Timor-Leste to’o ohin loron la halo manutensaun ba nia repeter sira entaun radio sira ne’e la funsiona.
“Maibe oras ne’e dadauk iha ona kompania ida, nebe ke Sekretariu Estadu Defeza autoriza hala’o hela servisu kona ba montajen radio integradu nian iha distritu 13 nia laran,” nia informa.
Montajem radio integradu ne’e sei fasilita mos servisu PNTL, F-FDTL, membru Seguransa Sivil no mos membru Bombeirus sira iha distritu 13.
“Iha Dili oras ne’e dadauk radio integradu funsiona, agora iha distritu sira seluk radio sira ne’e la funsiona,” Diretora Ribeiro hateten.
Entertantu fiskalizasaun nebe mak Membru Parlamentu halo iha fronteira nota katak, Polisia fronteira la iha kondisaun ba sira liu-liu kona ba raio komunikasaun nian.
“Iha fin de semana hau iha hau nia rai, triste tebe-tebes Polisia sira iha fronteira ho Indonesia nebe la iha kondisaun,” hateten Deputadu Adriano do Nascimento.
Tuir Deputadu ne’e, maske nia parte koalia be-beik ona asuuntu n’e ho komandante sira no Sekretariu Estadu Seguransa maibe kontinua laiha rezultadu.
“Polisia sira nebe mak jaga tesik Lebos ninian tun mai iha Fatululik ninian ne’e la iha radio komunikasaun, nebe sira uza deit handphone atu hato’o informasaun importante ruma ba iha Distritu,” nia dehan.
Entertantu Prezidenti Parlamentu Nasional Fernando Lasama, mos lamenta tanba maske orsamentu aprova ona maibe la sosa ekipamentus ba polisia fronteira sira.
“Dehan atu sosa buat ida ne’e mais desde tinan kotuk to’o agora la sosa nafatin, lahatene bainhira mak to’o mai,” Lasama kestiona.
