“Kompania ke’e sai hotu fatuk sira iha estrada laran, agora ke’e ona iha Pantai Kelapa nian tama to’o iha Portu nia oin e hau koalia tiha ho hau nia kolega ida enjineiru kualifikadu, nia hasai mestradu iha Portugal e agora Asesor Prezidente Parlamentu, nia dehan Estrada kuandu ke’e sai hotu fatuk iha laran depois tau fali rai hodi silindru halo rata tiha, ne’e dezastre bo’ot ida,” kritika Deputadu Inacio Moreira, semana kotuk (05/03), iha Uma Fukun, Dili.
Deputadu Moreira husu ba Governu atu responsabiliza tanba halo estrada emerjensia ne’ebe la iha kualidade kria fali dezastre.
“Konsorsiu mak halo fali estrada hanesan ne’e halo nusa, ne’e ita ba iha nebe, se iha duni intensaun atu fahe osan deit hateten deit ami hakarak fahe osan,mais labele halo buat ida hanesan ne’e,” Deputadu ne’e kestiona.
Entertantu Deputadu Arao Noe dehan, reabilitasaun estrada iha Dili laran kompara ho Governu Japaun ne’ebe halo estrada iha Maubise ba Ainaro hanesan deit tanba la iha kualidade e agora naksobu hotu ona.
“Tanba ne’e mak hau konkorda ho Deputadu Inacio komentariu, parte teknika ninian sira halo planu oinsa ne’e ita la hatene,” Deputadu Noe kestiona.
Tuir Deputadu ne’e katak, kondisaun rai Timor lahanesan ho rai sira seluk. “Tenke uza fatuk husi okos para nia bele tahan, se tahu karik nia bele tahan, se hasai tiha fali fatuk ne’e mak tau direitamente rai nia sei la dura,” Deputadu ne’e katak.
Nia sujere ,diak liu uja fatuk bobot sira susun iha kraik depois silindru hanehan tau fali fatuk krikil mak tau aspal.
