“Vice Ministra Saúde fo sai informasaun katak minsiterio saúde sei halo fomigasaun iha bairo ne’ebe prioridade hanesan Suku Comoro entau hau mos husi suku Comoro ami hein hela maibe to’o agora ami lahare fomigasaun ne’e tanba pasiente dengue maioria husi Suku Comoro entau presiza tau atensaun lalais,” kestiona Deputada Ilda Maria da Conçeicão, semana kotuk (28/02) iha Parlamentu Nasional.
Tuir Deputada ne’e, Ministeriu Saude tenke toma atensaun lalais tanba kondisaun ida ne’e grave.
Iha fatin hanesan Deputada Gertrudes Monis dehan la’os Suku Comoro deit mak hein fomigasaun husi ekipa Ministerio Saúde maibe iha suku balun mos seidauk tama inklui mos bairo Ailoklaran ne’ebe sai mos fatin prioridade atu tau atensaun.
“Konbustivel laiha atu utilize makina hodi hala’o fomigasaun iha kapital no distritu laran ne’e, problema la’os kombustivel maibe jastaun ministerio saude mak tenke hadia realidade doutora sira iha ospital deit lamenta ba jestaun Ministerio Saúde nian,” Deputada Moniz kritika.
Hatan ba preokupasaun hirak ne’e, Diretor Jeral Ministerio Saúde, Agapito da Silva Soares, katak sira nia ekipa halo ona fomigasaun husi tasi tolu.
“Karik komunidade laiha fatin, no iha fatin balun latama maibe ba komunidade sira ne’ebe presiza halo fomigasaun bele informa direitamente ba Distritu Dili hodi bele halo fomigasaun,” nia husu.
Tuir nia, hare ba kapasidade no fasilidade ne’ebe limitadu, komunidade iha kazu ruma lalais informa ba distritu no ministerio saúde katak presiza halo fomigasaun labele hein Ministeriu Saúde tanba partisipasaun komunitario iha asuntu ne’e importante nune’e bele ajuda ministerio saúde atu bele lalais halo intervensaun.
Informasaun kona ba laiha kombustivel, nia parte rejeita tanba kombustivel atu kombate moras dengue sempre iha. “Tanba ne’e kazu emerjensia entaun iha osan urjenti, ne’ebe la’os orsamentu mak laiha maibe prosesu mak naruk,” nia informa.
Tuir nia, iha ekipa tolu mak halo fomigasaun hodi prevene moras dengue. Ekipa tolu ne’e mak Distritu Dili hala’o fomigasaun iha Tasitolu, ekipa MS nian iha Becora no ekipa husi Kompania Merlion iha sentral ba area ne’ebe proridade liu.
