Julgamentu ne’ebe halo iha TDD, iha 01 Marsu, diriji husi Juiza Edite Palmira no Reprezentante husi Ministeriu Publiku (MP) Prokurador Nelson de Carvalho no suspeitu hetan defeza husi Advogadu Jose da Silva.
Vitima ho inisial N ne’ebe la’en mate ona hetan baku husi suspeitu E ho F (kuinada husi nia laen nian).
Vitima N konta, hafoin nia la’en mate, nia ho nia oan hela iha sira nia uma, maibe iha tempu dadersan ida, iha 03 Dezembru 2010 bainhira vitima hader, hare surat tahan ida sikat hela iha sira nia didin lolon ho hakerek “ diak liu o sai tiha deit’ e liafuan ne’e halo vitima hirus no ba husu kedas iha suspeitu nain rua ne’e.
Suspeitu F nebe hanesan alin rasik husi vitima nia la’en ne’e hatan ho hirus katak ‘o duni maka tenki sai husi uma ne’e tanba o laiha direitu ona ba uma ne’e’.
“Hau nia katuas oan mate tiha e sira hakarak buka problema ho hau, sira duni hau sai husi uma ne’e para uma ne’e sira maka atu hela. Iha dader ida sira hakerek iha didi lolon dehan ‘Diak liu o sai tiha deit’ ne’e maka hau husu hakerek hanesan ne’e hakerek ba se’e, no se’e los maka sai husi uma ne’e” dehan vitima ne’e.
Tanba vitima husu hanesan ne’e, arguidu F ba bolu tiha E, sira nain rua baku lisuk vitima ne’e, rasta vitima nia fuk no dudu to’o tama iha haris fatin laran no tuku vitima nia ibun, enkuantu arguidu E basa dala ida iha vitima nia hasan no ba foti kanuru suru rai henek atu ba baku vitima maibe vizinhu ho inisial A mak hirus hodi arguidu tau fali sasan ne’e, sai ba liur.
Enkuantu testamunha husi vititma ho inisial A konkorda katak los duni arguidu nain rua baku lisuk vitima no tuku vitima nia ibun to’o bubu bo’ot no ain to’o kanek no fuk nakrakat at los.
“Hau ba sori mais sira nafatin rasta malu, hau hare arguidu E atu ba foti kanuru suru rai henek atu baku ba vitima N, ne’e duni hau hirus e lakonsega baku no sira mos para tiha rasta malu,” dehan testamunha A.
Entertantu arguidu E fo nia deklarasaun katak, dadersan ne’e “hau iha hela hau nia uma, labarik ida maka ba bolu hau dehan sira baku malu hela, nebe hau mos tun ba maibe hau ba ne’e ho intensaun atu sori sira maibe tanba vitima tolok fali hau, ne’e mak halo hau mos nervozu no hau ba basa deit nia no tanba nia rakut hau nia liman ne’ebe hau ba foti kanuru suru rai henek ne’e atu baku mais lakonsege tanba kolega ida hakilar nebe hau mos la konsege baku,” dehan arguidu ne’e.
Hafoin rona tiha deklarasaun husi vitima no arguidu sira ho tan testamunha, Juiza Edite Palmira deside katak arguidu sira sei mai fila-fali iha Tribunal, iha dia 15 Marsu 2012, tuku 10:00 dader hodi rona desizaun husi Tribunal.
