Komandante Polisia Tranzito Nasional Inspektor Xefe Antonio L. C. Soares hateten durante loron tolu (23, 26 no 28 Fevereiru) halo cek point ba kareta sira, konsege prende ona taxi hamutuk 67.
“Taxi nebe mak laiha dokumentus hamutuk 14, uza reben metan hamutuk 20, la uza farda hamutuk 56, laiha SIM hamutuk 5, dokumentus liu prazu hamutuk walu,”dehan Inspektor Xefi Antonio L.C. Soares, iha nia knar fatin Kaikoli, Dili semana kotuk (06/03).
Tuir nia, ida ne’e kontra ona regulamentu nebe mak iha no tenke selu multa, depois mak bele foti fali.
Entretantu membru Komisaun B Parlamentar, Deputadu Paul Martins, apoia tomak atividade polisia tranzitu nian hodi prende taxi no motorizada sira ne’ebe kontra regulamentu tranzitu nian, maibe tenke halo bebeik.
“Tanba ita hare katak kareta no motor kalan la’o ahi oan balu laiha, nebe tenke kontrola mos ida ne’e. Polisia sira halo sira nia servisu diak ona, dadersan ita hare sira iha kurzamentu sira ne’e hodi regula movimentu sira ne’e para ita hotu bele la’o ho diak,” dehan Deputadu Martins.
Eis Komandante Jeral PNTL ne’e mos husu ba taxista sira, tenke iha kondisaun nebe maka mos no tenke uza farda e diak liu tan uza ID Card hanesan iha nasaun seluk atu nune’e bele iha mos interese diak husi pasajeiru sira, “tanba taxista sira dala ruma uza kalsa badak deit,” nian katak.
