Guarda Nasional Republika (GNR) Portugal fo ajuda ba feto trabalhador domestika (pembantu rumah tangga) nia oan sira liu husi Working Women Centre (WWCTL) tanba salariu ne’ebe sira hetan ki’ik liu no la sufsiente atu sustenta moris familia nian.
“Esperensia ne’ebe ami iha no ami hare katak ema barak mak presiza sasan sira ne’e. Ami espera katak sasan ne’e bele ajuda ema barak liu–liu domestic workers sira iha area rural, e ami kontente ajuda Timor oan,” dehan Kapitaun GNR, Duque Martinho, foin lalais (28/02) bainhira vizita WWCTL iha Fatu-hada, Dili.
Tuir nia, sira la suporta finansiamentu maibe supporta sasan hanesan roupa (labarik nian) sapatu, livrus no boneka inklui mos roupa ema bo’ot sira nian (feto domestic workers). “liu-liu sira ne’ebe iha Distritu, sira nia salariu la sufsiente atu sosa labarik sira nia sasan,”.
Nia mos husu ba komunidade Portugueza atu fo ajuda solidaridade hanesan sasan sira hodi tau iha container hamutuk 25 hodi haruka mai iha Timor hodi fahe ba labarik sira ne’e.
Iha parte seluk Advokasia Officer WWCTL Pascoela hateten apoiu ida ne’e importante tebes ba sira, nune’e bele ajuda feto maluk sira ne’ebe laiha kbi’it atu sosa sasan sira ne’e.
“Ami hetan informasaun katak domestic workers iha Distritu lima hanesan Distritu Ermera, Baucau, Oecusse, Lospalos no Dili sira nia kondisaun ladun diak ita hare husi salario ne’ebe sira hetan kada fulan la to’o estandar ne’ebe ita nia lei laboral dehan no sira ladun hetan asesu ba sira nia direitu.”
Nia hatutan katak bazea ba dadus ne’ebe sira hetan husi focal point sira iha distritu katak domestic workers ne’ebe agora dadaun halao hela servisu iha Distritu Ermera hamutuk na’in 20, patraun nain lima deit mak fo informasaun tanba ne’e difisil tebes atu hetan informasaun ne’ebe klean, Distritu Baucau iha nain 15, Distritu Oecusse nain 15 inklui mos Distritu Dili hamutuk na’in 22.
“Maibe sira nia moris diak hotu katak salario tuir standard,” nia katak.
Nia informa mos katak domestic workers barak liu mak simu salario minimu $50 ne’e la to’o estandar ne’ebe iha ne’e maioria husi distritu no seluk simu salario naton estandar $80 ne’e diak ona ne’e maioria iha capital Dili.
