Hafoin Kandidatu Prezidente da Republika ba period 2012-2017, hakotu iis (mate) iha Ospital Naisonal Guido Valadares (HNGV) iha 06 Marsu, ofisialmente Sekretariadu Tekniku Administrasaun Eleitoral (STAE) halo kanselamentu ba matebian nia bulletin de votu.
“Ami sei fo kanseladu ba kandidatu Francisco Xavier do Amaral nia fotografia no nia simbolu, se mak vota ba kandidatu ne’e, votus ne’e lasura no sei la vale,” hateten Diretor STAE Tomas Cabral, semana kotuk (07/03) iha Kaikoli, Dili.
Tuir Diretor Cabral, kansalementu ba fotografia no simbolu matebian nian tau kedas karimbu STAE nian. “ STAE prepara hela 40 pesoas tuir formasaun e sira ne’e servisu oras 24 nia laran hodi tau karimbu kanseladu,” Diretor ne’e katak.
Entertantu Ekipa Susesu Kandidatu Prezidenti Francisco Xavier do Amaral nian, Arlindo Marcal pronto atu hapara sira nia kampanha politika.
“Ami grupu tomak husi ekipa susesu ami nia hakarak ne’e prezidenti Xavier nia vida ne’e naruk to’o prosesu Demokratiku ne’e to’o remata maibe ita nia hakarak ida ne’e, ita nia Na’i Maromak nia hakarak seluk, laran triste halo prosesu ne’e to’o klaran ona, CNE ho autoridade sira halo desizaun ida ne’e, ami sidadaun ida ami respeita desizaun nebe halo ona,” Xefe Ekipa Susesu Marcal dehan.
Xefe Ekipa Susesu ne’e apresia desizaun nebe CNE fo kona ba sira nia direitu hetan subsidiu ba kampanha eleitoral.
Nia hateten, iha tempu badak nia laran sira sei halo aprosimasaun ba kandidatu nebe mak sira hakarak fo apoiu iha eleisaun prezidensial ninian.
“Desizaun ida mak ne’e ami fo apoiu fali kandidatu ida iha tempu badak,ami sei halo aprosimasaun ba kandidatu nebe bele iha relasaun ho prezidenti Xavier, kandidatu nebe iha aspirasaun historiku ho prezidenti Xavier para ami bele kontinua nafatin prosesu ida ne’e,” Nia katak.
Nia husu ba militante sira iha Timor laran tomak atu manten fiar nafatin ba bloku proklamador nian atu luta nafatin.
