Segundu Komandante Polisia Nasional Timor-Leste, PNTL, Distrito Oé-Cusse, Asistenti Superintendente Albino Mauzinho, semana kotuk (06/03), iha nia knar-fatin Santa Rosa hateten katak sira nia parte pronto ona atu halao siguransa iha tempo kampanha no sei garante katak eleisaun sei lao livre atu nune komunidade sinti seguru hodi partisipa iha Festa Demokrasia.
‘’PNTL pronto kualker oras atu halo seguransa ba populasaun kona ba elisaun ne’e. Ami preparadu ona atu halo seguransa no ami garante katak eleisaun prezidensial sei lao diak no ho susesu no komundade sei sinti seguru no hakmatek partisipa iha Festa Democrasia ne’e,” Segundu Komandante Mouzinho hateten.
Segundu Komandante Mouzinho haktuir tan katak tuir plano PNTL Distrito Oé-Cusse, sei fo siguransa prioridade liu ba area sira ne’ebe maka iha risku dezastre naturais tamba ne’e sei aloka elementu polisia tolu to’o hat kada estasaun de votu.
”Konaba fatin ne’ebé risku ita identifika fatin pontensial ba mosu dezastre naturais hanesan mota bot impede movimentasaun ami sei ajuda para faslita sira liu. Inklui rai monu ka halai hodi taka dalan ne’e ami sei kopera ho instituisaun relevante atu rezolve,” nia hateten tan.
Entertantu reprezentante Joventudi Nitibe, Hilario Da Costa Babo, louva ho servisu PNTL tamba ezekuta sira nia knar ho professional.
”Ita nia polisia sira agora, halaon servissu diak tebes. Sira lao tuir lei no orden, la halis ba ema ida tamba ne’e hau pesoal kontenti tebes atu sira nafatin mantein professional. Kona ba elisaun rua nebe akontese iha tinan ne’e, ita nia PNTL sei garante siguransa diak maski ho faslidade nebe naton deit,” hateten Reprezentante Joventude Babo.
