Atu hadia diak liu tan nivel edukasaun Timoroan nian, Governu Australia no Nova Zelandia liu husi sira nia Embaixada iha Timor-Leste oferese tan bolsu estudus ba Timor oan na’in 33 iha 2013, iha area ne’ebe prioridade liu ba dezenvolvementu iha future.
“Bolsu estudu ne’e improtante tebes ba estudante Timoroan sira atu hadia sira nia edukasaun hodi aumenta kuinesementu diak nune’e ba futuru bele kontribui ba dezenvolvimentu nasaun Timor –Leste rasik,” dehan Embaixador Australia, Miles Armitage, semana kotuk (06/03) iha Hotel Timor, Dili.
Embaixador Armitage haktuir, governu Australia hahu fo bolsu estudus ba Timor oan iha 2000 to’o ohin loron e dala ida ne’e fo liu prioridade ba estudante feto sira.
“Ba tinan 2013 kategoria ema nain 33, e fo liu oportunidade no korajen ba estudante feto sira iha area rurais, estudante ho difisiensia inklui funsiunariu publiku ne’ebe iha interese atu estuda iha Australia,” Embaixador Armitage afirma.
Enkuantu total Timor oan ne’ebe remata ona sira nia estudu iha Universidade Australia hamutuk 143, barak mos iha Nova Zelandia e ida ne’e progresu diak hodi fo kontribuisaun ba dezenvolvementu nasaun ida ne’e. “barak mos agora tur iha posisaun senior iha funsaun publiku no governu,”.
Iha lidun seluk Embaixador Nova Zelandia, Tony Fautua katak edukasaun mak komponete importante husi apoiu bilateral ne’e tanba edukasaun mak edukasaun no dezenvolvimentu kapasidade mak xave ba ema ida atu kontribui ba dezenvolvimentu nasaun ida. Apoiu ne’e hanesan refleta parseira besik entre Nova Zelandia, Timor –Leste no Australia.
“Ami sei enkoraja Timor oan sira atu estuda iha area prioridade sira ne’ebe Timor-Leste presija ba dezenvolvimentu nasaun, ami espera katak estudante sira ne’e bele fo benefisiu ba nasaun murak ida ne’e iha futuru,” dehan Embaixador Fautua.
Nia hatutan katak tinan 2013 sei oferese ba estudante hamutuk nain 15 hodi aumenta numeru estudante 32 ne’ebe mak agora daduan halao hela estuda iha Nova Zelandia no nain 19 ne’ebe aranka iha tinan 2012 sei hasai gelar hanesan licenciatura, post graduadu, Mastreadu no programa doutradu.
Nia hatutan liu katak sira pronto fo apoiu maibe area prioridade ne’ebe Timor-Leste presija ne’e governu Timor-Leste mak deside maibe tuir informasaun ne’ebe iha katak area refere mak hanesan Turismu, Edukasaun, Agrikultura, Saúde hanesan mediku, Engenaria ou construsaun, Lingua, ekonomia /negosio no seluk tan.
Ba applikantes sira ne’ebe iha interese bele foti formulario iha programa desenvolvimentu kapasidade sector publiko (PSCDP), Scholarship office Dili hahu loron segunda 2 de Abril 2012 tuku 8:30 dader to’o 5:00 lokraik to’o sesta feira. Applikantes sei taka iha dia 30 de Abril 2012.
